უკრაინელი ოპოზიციონერი დეპუტატები მიხეილ სააკაშვილს თავდებში ჩაუდგნენ. მათ რამდენიმე წუთის წინ ხელი მოაწერეს დოკუმენტს, რომლიც მიხედვითაც ისინი თავდებში უდგებიან ოდესის ყოფილ გუბერნატორს, რომლის მიხედვითაც სააკაშვილი კანონით გათვალისწინებულ ყველა მოთხოვნას დააკმაყოფილებს.
რადას დეპუტატის, იური დერევიანკოს თქმით, რადას 12 დეპუტატი მზად არის მიხეილ სააკაშვილს თავდებში დაუდგეს, რათა დარბაზიდანვე გაათავისუფლონ. ამ დეპუტატებს შორის არიან იულია ტიმოშენკო, დერევიანკო.ვიქტორ ჩუმაკი, ვიტალი კუპრიი, დიმიტრი დობროდომოვი, ნატალია ნოვაკი, , ალიონა შკრუმი, ალექსანდრე ოპანასენკო, პაველ კოსტენკო, ეგორ სობოლევი, ივან კრულკო და ალექსეი რიაბჩინი.
პარტია“ ბატკივშინას“ ლიდერი იულია ტიმოშენკო, რომელიც მიხეილ სააკაშვილის საქმეზე მიმდინარე სასამართლო პროცესს ესწრება, განვითარებულ მოვლენებს სამარცხვინოს უწოდებს.
იგი აცხადებს, რომ თუ უკრაინაში არსებობს სასამართლო, მაშინ მიხეილ სააკაშვილი ყოველგვარი აღკვეთის ღონისძიების შეფარდების გარეშე უნდა გაათავისუფლონ დარბაზიდან.
„ასეთი სასამართლო გარჩევების და ასეთი პროკურორების პირობებში, უკრაინის პრეზიდენტი არცხვენს უკრაინას და ამიტომ, აუცილებლად დადგება იმ თანამდებობის პირების სისხლის სამართლის პასუხისმგებლობის საკითხი, რომლებიც მართავენ აბსოლუტურად უსაფუძვლო სასამართლო პროცესს. გარდა ამისა, თუ უკრაინაში არსებობს სასამართლო, მაშინ მიხეილ სააკაშვილი უნდა გაუშვან დარბაზიდან სახლში. ნებისმიერი აღკვეთის ღონისძიების გარეშე,“ – განაცხადა იულია ტიმოშენკომ.
მიხეილ სააკაშვილის საქმეზე სასამართლო პროცესი ამ წუთებში მიმდინარეობს. მხარეებმა უკვე წარმოადგინეს შესაბამისი შუამდგომლობები. ამ წუთებში მოსამართლე გადაწყვეტილების მისაღებად არის გასული.