თემურ ჯანაშიას ინფორმაციით, ანზორ ჩუბინიძის ხელმძღვანელობით სდსს-მ 7 თვეში 6 მილიონ 500 ათასი ლარის ე.წ. ფარული ხარჯი გაწია სდსს-ს ყოფილი უფროსის თემურ ჯანაშიას ინფორმაციით, ანზორ ჩუბინიძის ხელმძღვანელობით სახელმწიფო დაცვის სპეციალურმა სამსახურმა 7 თვეში 6 მილიონ 500 ათასი ლარის ე.წ. ფარული ხარჯი გაწია. როგორც ჯანაშიამ ე.წ. პიჯაკების საქმეზე სასამართლო პროცესის დაწყებამდე განაცხადა, დაცვის მხარე ეტაპობრივად წარადგენს მტკიცებულებებს, რომლითაც დასტურდება, რომ სახელმწიფო დაცვის სპეციალური სამსახური, ანზორ ჩუბინიძის ხელმძღვანელობის პერიოდშიც გაწევდა ხარჯებს ყოფილი პრეზიდენტის ვიზიტებზე.
"წინა სასამართლო პროცესზე ჩვენ წარვადგინეთ დაახლოებით მილიონამდე გადარიცხვა, რაც მხოლოდ ერთ თანამშრომელზე იყო გაცემული. ახლა სათითაოდ ვიკვლევთ ამ გადარიცხვებს და წარმოვადგენთ ამ მტკიცებულებებს. ზოგადად 7 თვის განმავლობაში დაახლოებით 6.5 მილიონია დახარჯული ე.წ. ფარული ხარჯების სახით. ადრე თუ გვიან, ამ ყველაფერს ფარდა აეხდება", – აღნიშნა თემურ ჯანაშიამ.
ე.წ. პიჯაკების საქმეზე ბრალი ყოფილ პრეზიდენტს მიხეილ სააკაშვილსა და სახელმწიფო დაცვის სპეციალური სამსახურის ყოფილ უფროსს თემურ ჯანაშიას აქვს წაყენებული. გამოძიება მათ 9 მილონამდე ლარის საბიუჯეტო თანხების გაფლანგვას ედავება. გამოძიების თანახმად, სდსს მიხეილ სააკაშვილის განკარგულებით, საბიუჯეტო თანხებს, სააკაშვილის პირად კომფორტზე ხარჯავდა და შემდგომ ამ ხარჯებს გრიფი „საიდუმლო“ ედებოდა, რათა საზოგადოებისთვის არ გამხდარიყო ცნობილი, თუ რაში იხარჯებოდა თანხები.