ოღონდ ხმოსნებს ნუ დაგვიძახებთ და საარჩევნო კოლეგიის წევრები ვიქნებითო – კონსტიტუციაში ცვლილებების განხილვა პარლამენტში ენათმეცნიერული შესავლით იწყებს

0
467
ტერმინი ”ხმოსანი” ქილიკის საგანი გახდა – შესაბამისად, მიღებულ იქნება გადაწყვეტილება ტერმინის შეცვლის შესახებ, – ასე განმარტა პარლამენტის თავმჯდომარე ირაკლი კობახიძემ კონსტიტუციაში ”ხმოსანის“, ტერმინით – ”საარჩევნო კოლეგიის წევრი“ ჩანაცვლების თაობაზე მიღებული გადაწყვეტილება.
 
კობახიძემ აქვე აღნიშნა, რომ ეს ტერმინი ძირძველი ქართული წარმოშობისაა. 
 
ქუთაისში, პარლამენტის პლენარულ სხდომათა დარბაზში, ახალმიღებულ კონსტიტუციაში დაგეგმილი ცვლილებების პროექტის საყოველთაო-სახალხო განხილვა მიმდინარეობს. 
 
საკონსტიტუციო ცვლილებების გაცნობამდე, ირაკლი კობახიძემ საყოველთაო-სახალხო განხილვის მონაწილეებს პარლამენტის მიერ სამი მოსმენით მიღებული კონსტიტუცია გააცნო. 
 
კონსტიტუციური კანონის პროექტი შემდეგ ძირითად ცვლილებებს ითვალისწინებს: – კონსტიტუციის ახალი რედაქციიდან ე.წ. ბონუსის სისტემის ამოღება ხდება. ახალი ვერსიის თანახმად, გაუნაწილებელ საპარლამენტო მანდატებს თანმიმდევრობით უკეთესი შედეგის მქონე პოლიტიკური პარტიები მიიღებენ.
 
მომდევნო საპარლამენტო არჩევნებში მონაწილეობის შესაძლებლობა, პოლიტიკური პარტიების გარდა, საარჩევნო ბლოკებსაც ექნება.
 
იცვლება რწმენის, აღმსარებლობისა და სინდისის თავისუფლებასთან დაკავშირებული 16-ე მუხლი, საიდანაც სიტყვების: – ”სახელმწიფო უსაფრთხოება“, ”დანაშაულის თავიდან აცილება“ და ”მართლმსაჯულების განხორციელება“ ამოღება ხდება. 
 
გარდა ამისა, ფართოვდება საკონსტიტუციო სასამართლოს უფლებამოსილებები საარჩევნო ნორმებისა და არჩევნების არაკონსტიტუციურად ცნობასთან დაკავშირებით. კერძოდ, სამი თვით იზრდება შესაბამისი სარჩელის განხილვის ვადები. ასევე, უქმდება ჩანაწერი, რომლის თანახმად, არჩევნების კონსტიტუციურობის საკითხს საკონსტიტუციო სასამართლო სიითი შემადგენლობის სრული თანხმობით წყვეტს. 
 
ახალმიღებულ კონსტიტუციაში ტერმინი ”ხმოსანი” აღარ იარსებებს. პროექტი ცვლილებების განხორციელებას პრეზიდენტის არჩევის წესთან დაკავშირებულ 50-ე მუხლშიც ითვალისწინებს, თუმცა ეს მხოლოდ ტერმინოლოგიური ცვლილებაა და ”ხმოსანი“ ტერმინით – ”საარჩევნო კოლეგიის წევრი“ იცვლება. 
 
საკონსტიტუციო ცვლილებები პარლამენტს უმრავლესობის 116 დეპუტატის ხელმოწერით წარედგინა. 
 

წინა სტატიაროგორ უპასუხა პრეზიდენტმა სააკაშვილმა ჩიაკაცურ შეტევას რეზიდენციაზე და როგორ – პრეზიდენტმა მარგველაშვილმა
შემდეგი სტატიასოფელ ნაბაკევში, ე. წ. რუსმა მესაზღვრეებმა სოფელ ხურჩაში მცხოვრები მორგოშიები დააკავეს
ტელეკომპანია ოდიშის საინფორმაციო სამსახური