დიდი ბრიტანეთის პრემიერმინისტრი კრემლს დასავლეთში განხეთქილების შეტანის მცდელობაში ადანაშაულებს.
მისი თქმით, ვლადიმერ პუტინი ცდილობს „ძირი გამოუთხაროს თავისუფალ საზოგადოებას“ – ერევა არჩევნებში, არაერთხელ დაარღვია ევროპული ქვეყნების საჰაერო სივრცე და მიზანმიმართულად ატარებს განხეთქილებისა და კიბერშეტევის კამპანიას.
„რუსეთი „ფეიქ ნიუსებს“ ავრცელებს, რათა დასავლეთში განხეთქილებას შეუწყოს ხელი. ჩემი მესიჯი მარტივია: მან სხვა გზა უნდა შეარჩიოს და არა ის გზა, რომლითაც მოხდა ყირიმის ანექსია და ევროპის ქვეყნებზე კიბერშეტევების განხორციელება. რუსეთი შეიძლება გახდეს დასავლეთის ღირებული პარტნიორი, ოღონდ იმ შემთხვევაში, თუ წესების მიხედვით ითამაშებს. ლონდონს არ სურს მუდმივი კონფრონტაცია რუსეთთან, თუმცა ბრიტანეთი თავის ინტერესებს დაიცავს. ვიცით, რაც გინდათ, მაგრამ ამას ვერ მიაღწევთ, ვინაიდან სათანადოდ ვერ აფასებთ ჩვენი დემოკრატიის მდგრადობას““, – განაცხადა ტერეზა მეიმ.
პარალელურად, განცხადებებს რუსეთის მიერ ქვეყნის შიდა პროცესებში ჩარევის შესახებ ოფიციალური მადრიდიც ავრცელებს.
ესპანეთის ხელისუფლების განცხადებით, არსებობს მტკიცებულებები იმის შესახებ, რომ პრო რუსულმა ჯგუფებმა, სოციალური ქსელების გამოყენებით, ესპანეთში დესტაბილიზაციის მიზნით, კატალონიის დამოუკიდებლობის რეფერენდუმის ჩატარებას შეუწყეს ხელი.