ბათუმში, „ალიანს პალასის“ მშენებარე კორპუსის ხარაჩო დაიშალა, მისი ჩამონგრევის შედეგად 5 ადამიანი დაშავდა. გავრცელებული ინფორმაციით, ამ დროს მესამე სართულზე ბეტონის ჩასხმის სამუშაოები მიმდინარეობდა. ხუთივე დაზარალებულები მშენებლობაზე მუშაობდა. ისინი ქალაქის სხვადასხვა საავადმყოფოში მოათავსეს.
როგორც ბათუმის სასწრაფო დახმარების სამსახურში აცხადებენ, დაზიანებები სიცოცხლისთვის შეუთავსებელი არ არის.
„სასწრაფო ადგილზე გამოძახებისთანავე მივიდა. იქ დაგვხვდა ხუთი დაშავებული, რომლებიც გადავიყვანეთ ბათუმის რეფერალურ საერთაშორისო საუნივერსიტეტო კლინიკასა და „მედინაში“. მათ სხვადასხვა ტიპის დაზიანებები აღენიშნებათ, თუმცა წინასწარი დათვალიერებით მათ სიცოცხლეს საფრთხე არ ემუქრება“ ,- განაცხადა ბათუმის სასწრაფო დახმარების სამსახურის უფროსის მოადგილემ ბადრი პაქსაძემ.
ჯერჯერობით ხარაჩოს ჩამონგრევის მიზეზი უცნობია.