სტრასბურგის სასამართლო წულუკიანში არც მორალურ და არც პროფესიულ სიხარულს არ იწვევს

0
370
საქართველოს იუსტიციის მინისტრი სტრასბურგის სასამართლოს აკრიტიკებს. თეა წულუკიანი ამბობს, რომ ადამიანის უფლებათა ევროპულმა სასამართლომ გვანცა ყუფარაძის საქმე არასათანადოდ განიხილა.
 
მინისტრის თქმით, სტრასბურგის სასამართლომ მთავრობა გაამართლა, რაც მასში არც მორალურ და არც პროფესიულ სიხარულს არ იწვევს.
 
„გვანცა ყუფარაძის საქმეზე სტრასბურგის სასამართლოს მიერ გამოტანილი გადაწყვეტილება, რომლითაც პრაქტიკულად მთავრობა გამართლდა, არავითარ პროფესიულ და მითუმეტეს მორალურ სიხარულს ჩვენში არ იწვევს, იმ უბრალო მიზეზის გამო, რომ ეს გადაწყვეტილება რეალურად არ შესულა სიღრმეებში. მე რა თქმა უნდა, მინახავს სტრასბურგის სასამართლოს გადაწყვეტილებები, რომელიც გაცილებით უფრო დეტალურად იხილავს ხოლმე პატიმრის და მითუმეტეს არასრულწლოვნის და მითუმეტეს გოგონას უფლებებს. დაველოდოთ მომჩივანი რა გადაწყვეტილებას მიიღებს,“ – განაცხადა თეა წულუკიანმა.
 
სტრასბურგის სასამართლომ ყუფარაძის საქმესთან დაკავშირებით, ევროკონვენციის ვერცერთი მუხლის დარღვევა ვერ დაადგინა. მოსარჩელე საქართველოს სამართლიანი სასამართლოს უფლების შელახვასა და საპატიმროში არაადამიანურ მოპყრობას ედავებოდა.
 
გვანცა ყუფარაძემ სასჯელაღსრულების დაწესებულება 2011 წელს დატოვა და ამჟამად იუსტიციის სამინისტროში მუშაობს.
წინა სტატიათუშეთში, სოფელ გირევთან და ადიგენში ხანძარია
შემდეგი სტატიადღეიდან ძალაში შევიდა შს მინისტრის გიორგი მღებრიშვილის სპეციალური ბრძანება, რომელიც ადგილობრივი თვითმმართველობის არჩევნებს ეხება
ტელეკომპანია ოდიშის საინფორმაციო სამსახური