დღეს 18.00 საათზე ბათუმში, სახელმწიფო მუსიკალურ ცენტრში იხსნება საერთაშორისო კინოფესტივალი BIAFF.
ფესტივალი გაიხსნება გიორგი ოვაშვილის ფილმით „ხიბულა“ეს ფილმის პირველი პრემიერაა საქართველოში, მისი საერთაშორისო პრემიერა კი კარლოვი ვარის კინოფესტივალზე გაიმართა.
პრემიერას ბათუმში დაესწრებიან რეჟისორი, მსახიობები და გადამღები ჯგუფის წევრები.
აჭარის ავტონომიური რესპუბლიკის ტურიზმისა და კურორტების დეპარტამენტის ინფორმაციით, გახსნის ცერემონიაზე საპატიო სტუმრად მიწვეულია ცნობილი ქართველი კომპოზიტორი გია ყანჩელი, რომელსაც კინოფესტივალის ყოველწლიური სპეციალური პრიზი მსოფლიო კინემატოგრაფში შეტანილი განსაკუთრებული წვლილისთვის გადაეცემა.
ასევე ქართველ მსახიობს ვახტანგ კიკაბიძეს გადაეცემა სპეციალური პრიზი სამსახიობო ოსტატობისთვის.
BIAFF კინოფესტივალი რვა დღეს გაგრძელდება და წარმოდგენილი იქნება, დაახლოებით, 40-მდე სრულმეტრაჟიანი მხატვრული/დოკუმენტური ფილმი და 40 მოკლემეტრაჟიანი ფილმი, 30 ქვეყნიდან.
ფესტივალის პროგრამა შედგება შემდეგი სექციებისგან: საერთაშორისო კონკურსი – მხატვრული, დოკუმენტური და მოკლემეტრაჟიანი ფილმების სექციები: დიდოსტატთა კოლექცია, ქართული პანორამა, სპეციალური ჩვენებები, “SHORT MATTERS!”- ევროპის კინოაკადემიის მოკლემეტრაჟიანი ფილმების კოლექცია, მასტერ-კლასები.