ჯუთასა და ყარაჯალაში ისევ ხანძარია, შილდაში ცეცხლი ჩააქრეს, ართანასა და ხახაბოში ვერტმფრენები მუშაობენ

0
398
ჯუთაში ისევ ხანძარია. გუშინ გაჩენილი ხანძარი ჩააქრეს, თუმცა დღეს ახალი კერა გაჩნდა. ცეცხლი ბალახს უკიდია,  ჯერჯერობით უცნობია, რა ფართობაზეა იგი გავრცელებული, თუმცა რადგან ეს ალპური ზონაა, ცეცხლის ლოკალიზება რთული არ არის.   ადგილზე  მობილიზებულები არიან სახანძრო-სამაშველო ბრიგადები. 
 
დღეს დილით ხანძარი  გაჩნდა თელავის მუნიციპალიტეტის სოფელ ყარაჯალაში  ცეცხლი ბალახს ეკიდა, ხანძრის შედეგად 1500 კვადრატული მეტრის ფართობი დაიწვა.  ამ დროისათვის ხანძარი ლიკვიდირებულია,  სალიკვიდაციო სამუშაოებში მეხანძრე-მაშველთა 5 ჯგუფი იყო ჩართული.
 
საგანგებო შტაბის ინფორმაციით, ხანძარი შილდის ტყეში, თითქმის, სრულად ჩააქრეს,  ხოლო ართანასთან და  ხახაბოსთან მდებარე ტყის მასივებში გაჩენილი ხანძრებს ცოცხალ ძალასთან ერთად ჯერ ისევ ებრძვის  ავიაცია – საქართველოს 2 და ირანის კუთვნილი 2 ვერტმფრენი, ხანძრის ნაწილი ლოკალიზებულია. 
 
„ართანის მიმართულებით დაკვამლიანების და ცეცხლის რამდენიმე წყაროა. იქ დილიდან  ვერტმფრენები მუშაობენ.  საკმარისი რაოდენობით ცოცხალი ძალა მისულია ცეცხლთან და ქვემოდან ამუშავებენ. გარდა ამისა, ვერტმფრენის მეშვეობით სოფლის ზემოთ გადავსხით დესანტი, რომ ცეცხლის გავრცელების არეალი ზემოდანაც შეეზღუდათ. რაც შეეხება თუშეთის მიმართულებას, ამჟამად ვერტმფრენი ცეცხლის ქრობის სამუშაოს ასრულებს, მანამდე მაშველები გადაჰყავდა, იმიტომ, რომ სხვანაირად თუშეთში ასვლას ძალიან დიდი დრო დასჭირდებოდა. ცოცხალი ძალის ცეცხლთან მიყვანა ხანდახან უფრო მეტად მნიშვნელოანია, ვიდრე ზემოდან წყლის დასხმა“, – განაცხადა კახეთის გუბერნატორმა ირაკლი ქადაგიშვილმა.
 
 

წინა სტატია,,სუხიშვილები”: რუსეთი ჩვენი მტერია! თუ თქვენ სხვანაირად თვლით, შეგიძლიათ თავად იცეკვოთ/იმღეროთ მოსკოვში !”
შემდეგი სტატიალებარდეს უნიკალური ხეობა იჩეხება და ნადგურდება
ტელეკომპანია ოდიშის საინფორმაციო სამსახური