განათლებისა და მეცნიერების მინისტრის მოადგილის ლია გიგაურის ინფორმაციით, 2018 წლის სექტემბრიდან, I-VI კლასის მოსწავლეები უფრო მაღალი ხარისხის სახელმძღვანელოებით ისარგებლებენ. ინფორმაციას ipn-ი ავრცელებს.
„ამ მიმართულებითაც ორი მნიშვნელოვანი ცვლილება გვაქვს: პირველი – სახელმძღვანელოები არსებითად გაუმჯობესებული იქნება შინაარსობრივად, ვინაიდან პროგრამები არის განტვირთული, ამასთან შეფასება მოხდება უფრო ბევრი და მრავალფეროვანი კრიტერიუმების მიხედვით. მნიშვნელოვანია, რომ სახელმძღვანელოების შეფასებაში პირველად ჩართული იქნება საზოგადოება – ავტორების მიერ წარმოდგენილი სახელმძღვანელოების პროექტები განთავსდება განათლების სამინისტროს ვებგვერდზე და ხელმისაწვდომი იქნება ყველა დაინტერესებული პირისათვის, რომელთაც შეეძლებათ, რომ თავისი შენიშვნები, რეკომენდაციები და შეფასებები შემოგვთავაზონ. ყოველივე ეს საშუალებას მოგვცემს და I-VI კლასის მოსწავლეებს 2018 წლის სექტემბრიდან უფრო მაღალი ხარისხის სახელმძღვანელოებს შევთავაზებთ”, – განაცხადა ლია გიგაურმა.
მისივე განმარტებით, ახალი სახელმძღვანელოების ტექნიკური მახასიათებლებიც გაუმჯობესდება.
ამასთან, მინისტრის მოადგილის თქმით, ჩანთის სიმძიმის პრობლემა მომავალში მოსწავლეებს ნაკლებად შეაწუხებთ, რადგან კიდევ ერთი სიახლე სახელმძღვანელოების ელექტრონული ვერსიების შექმნასა და განთავსებას უკავშირდება, როგორც მოსწავლეების ბუკებში, ასევე სამინისტროს ვებგვერდზე.
„თითოეულმა მასწავლებელმა ისე უნდა დაარეგულიროს ეს საკითხი, რომ მოსწავლეებს ჰქონდეთ ჩანაცვლების საშუალება და არ მოუწიოთ ყოველდღე დატვირთული ჩანთით სიარული. ელექტრონული ვერსიები ნაბეჭდი სახელმძღვანელოების პარალელურად მომზადდება და 2018-2019 სასწავლო წლიდან აიტვირთება”, – განაცხადა ლია გიგაურმა.