უმცროსი სერჟანტი მდინარ ბებიაშვილი სამშობლოში ბრუნდება

0
467
ავღანეთში დაღუპული უმცროსი სერჟანტის  მდინარ ბებიაშვილის ცხედარს დღეს  საქართველოში გადმოასვენებენ.
 გადმოსვენება ბაგრამის საავიაციო ბაზიდან, აშშ-ის საჰაერო ძალების სამხედრო თვითმფრინავით, სპეციალური რეისით მოხდება.
მას აეროპორტში დახვდებიან საქართველოს ხელისუფლების სხვადასხვა შტოს მაღალი რანგის წარმომადგენელები, საქართველოს შეიარაღებული ძალების, თავდაცის სამინისტროს, სხვა ძალოვანი უწყებების მარღლჩინოსნები, საზოგადოების წარმომადგენლები.
აეროპორტში მას საპატიო ყარაული დახვდება. სამხედრო საჩვენებელი ორკესტრი შეასრულებს სამგლოვიარო მარშს.
 
"დახვედრის შემდეგ ცხედარს  ჯერ სამხარაულის ექსპერტიზის ეროვნულ ბიუროში გადაასვენებენ, იქიდან კი, შესაბამისი პროცედურების ჩატარების შემდეგ, – მის მშობლიურ სოფელში  მარტოთუბანში, სადაც   დღესვე  სამხედრო პატივით დაკრძალავენ. '' – განაცხადა გენერალური შტაბის საზოგადოებრივ საქმეთა უფროსმა ოფიცერმა, ემზარ სვანიძემ. 
 
25 წლის მდინარ ბებიაშვილი წარმოშობით ზესტაფონის მუნიციპალიტეტის სოფელ მარტოთუბნიდან იყო. ის ავღანეთში რიგით მესამე სამხედრო მისიაში იღებდა მონაწილეობას. იგი საქართველოს შეიარაღებული ძალების სახმელეთო ჯარების დასავლეთ სარდლობის II ქვეითი ბრიგადის 23-ე ბატალიონში მსახურობდა და   „მტკიცე მხარდაჭერის“ მისიას ბაგრამის საავიაციო ბაზაზე ასრულებდა.
იგი ავღანეთში 3 აგვისტოს მოტორიზებული პატრულირების დროს თავდასხმის შედეგად დაიღუპა. 
 
თავდასხმის შედეგად დაშავდა კიდევ 3 ქართველი სამხედრო. მათ შორის ყველაზე მძიმე მდგომარეობა კაპიტან მიხეილ გვრიჯიშვილს აქვს. 
"მძიმე მდგომარეობა იყო და სტაბილურად მძიმედ რჩება კაპიტან გვრიჯიშვილის მდგომარეობა, ამ ეტაპზე კვლავ ბაგრამის აეროპორტში იმყოფება, მას ჩაუტარდა ოპერაცია თვალზე და ფეხზე. კონტროლირებადია ვითარება. ის გონზე ჯერ არ მოუყვანიათ სპეციალურად, რათა ორგანიზმმა დაისვენოს და ოპერაცია მშვიდობიანად ჩატარდეს. რაც შეეხება ხახუტაშვილს, ის გადაყვანილია გერმანიაში, მას ჰქონდა შედარებით მსუბუქი ჭრილობები ხელისა და ფეხის არეში, აბსოლუტურად კონტროლირებადი ვითარებაა, მსუბუქია ჭრილობები. რაც შეეხება მესამეს, ხარშილაძეს, ის ფაქტობრივად, მეორე დღესვე გამოიწერა, იმყოფება ბაგრამის საჰაერო ბაზაზე," – განაცხადა გენერალური შტაბის საზოგადოებრივ საქმეთა უფროსმა ოფიცერმა, ემზარ სვანიძემ. 
 
 
 
წინა სტატია19 წლის გოგონა ინტოქსიკაციის შედეგად კლინიკაშია გადაყვანილი
შემდეგი სტატიასუფსაში ორი მოზარდი დაიხრჩო – გოგონები დეიდაშვილები არიან
ტელეკომპანია ოდიშის საინფორმაციო სამსახური