„პატრიოტთა ალიანსის“ ერთ-ერთი ლიდერი, გიორგი ლომია, ამავე პარტიის ანალიტიკური სამსახურის ყოფილი უფროსის, ირაკლი ლატარიას მძიმე ბრალდებებს უარყოფს და ცილისწამებისთვის სარჩელის შეტანას აპირებს.
ირაკლი ლატარია, გიორგი ლომიას წამებაში ადანაშაულებს. ირაკლი ლატარიას განცხადებით, 2016 წლის არჩევნების დასრულების შემდეგ, ის სახლიდან მოტყუებით გაიყვანეს, "პატრიოტთა ალიანსის" ოფისში კი სკამზე დაბმული გიორგი ლომიამ სცემა. მიზეზი სოციალურ ქსელში "პატრიოთა ალიანსის" წევრების წინააღმდეგ გაკეთებული განცხადებები იყო, რომლის შინაარსსაც ირაკლი ლატარია კატეგორიულად უარყოფს.
"პატრიოტთა ალიანსის" ყოფილმა წევრმა, პროკურატურას სარჩელით უკვე მიმართა. გიორგი ლომია მიიჩნევს, რომ მსგავსი პროცესები მართულია, თუმცა, ვინ მართავს ამ პროცესებს, მისთვის ჯერ უცნობია.
„როგორც თქვენ არ იცნობთ, ჟურნალისტები, ასევე არ იცნობს მას 99,9% საქართველოს მოსახლეობის. დღეს ყველა არის დაკავებული იმით, რომ საკუთარ თავზე უნდათ, რომ მიიქციონ ყურადღება. ჩვენ შევიტანთ სარჩელს ცილისწამებისთვის, რასაკვირველია, მაგრამ საქმე არის იმაში, რომ როდესაც ასეთ ბრალდებას დებ, მოტივი უნდა არსებობდეს. გარკვეული ეჭვი მაქვს, რომ ეს არის მართული პროცესი და უბრალოდ, ვცდილობ დავადგინო, თუ ვის მიერ არის მართული,“ – განაცხადა გიორგი ლომიამ.
საქართველოს პარლამენტის თავმჯდომარის მოადგილე, ფრაქცია ”საქართველოს პატრიოტების” წევრი, ირმა ინაშვილი აცხადებს, რომ ირაკლი ლატარიას ბრალდებები უსაფუძვლოა ეს „პატრიოტთა ალიანსის“ პარტიის წინააღმდეგ მიმართული კამპანიაა. მისი თქმით, მსგავსი ცილისწამების მცდელობა ადრეც იყო.
„ირაკლი ლატარიას არავინ არ ემუქრებოდა, არც მომავალში არ დაემუქრება. არავითარი ინტერესი, მოტივაცია, არ ჰქონდა და არც არასდროს არ ექნება გიორგი ლომიას, რომ დაემუქროს ირაკლი ლატარიას ან ვინმე სხვას. აქტიურად ვითანამშრომლებთ ჩვენ გამოძიებასთან,“ – განაცხადა ირმა ინაშვილმა.
მისი თქმით, ირაკლი ლატარიას ამ ცილისწამების დასაბუთება მოუწევს.