დღეს დილით თბილისში, დიდ დიღომში, დავით აღმაშენებლის ხეივნის მიმდებარე ტერიტორიაზე მშენებარე საცხოვრებელი კორპუსიდან ახალგაზრდა მამაკაცი გადმოვარდა და ადგილზე გარდაიცვალა. როგორც მშენებელთა პროფკავშირების წარმომადგენლებმა უბედური შემთხვევის ადგილი დაათვალიერების შემდეგ განაცხადეს, არმოჩნდა, რომ ობიექტს არც შრომის ინსპექტორი ჰყავს და არც უსაფრთხოების ბადეებია დამონტაჟებლი.
მიხედავად იმისა, რომ მთავრობა ყოველი ასეთი შემთხვევის შემდეგ იწყებს საუბარს მშენებლობებზე დასაქმებული ადამიანების უსაფრთხოების რეგულაციების გამკაცრებაზე, მაგრამ ცვლილებები არ ჩანს.
დღევანდელ შემთხვევასაც კვლავ დაპირებებით გამოეხაურა თბილისის მერი დავით ნარმანია და ისევ სტანდარტული განცხადებით, რომ რეგულაციები გასამკაცრებელია და ხელისუფლება მუშაობს ამ მიმართულებით განსახორციელებელ ცვლილებებზე კანონმდებლობაში.
”რეგულაციები აუცილებლად გასამკაცრებელია და ეს გათვალისწინებული იქნება მშენებლობის ახალი კანონმდებლობით, რომლის განხილვა მიმდინარეობს. მანამდე არსებული რეგულაციების პირობებში ქალაქის ზედამხედველობის სამსახური უზრუნველყოფს იმას, რომ მშენებლობის ობიექტზე მინიმალურად იყოს დაცული უსაფრთხოების ნორმები, ობიექტს ჰქონდეს უსაფრთხოების ბადეები, იყოს შესაბამისად აწყობილი ხარაჩოები და ა.შ. სამწუხაროა ის, რომ კომპანიები ხშირ შემთხვევაში დაუდევრად იქცევიან. არ არის შესაბამისი საკითხები დარეგულირებული და მოწესრიგებული, ასე რომ, მნიშვნელოვანია გაუფრთხილდნენ თავიანთ დასაქმებულ ადამიანებს”, – განაცხადა დავით ნარმანიამ მედიისთვის გაკეთებულ კომენტარებში.
ოფიციალური სტატისტიკური მონაცემებით, მიმდინარე წელს მშენებლობაზე დაღუპულია 9 მუშა, ხოლო 2006 წლიდან დღემდე კი 271. მშენებლობაზე ტრამვირებულთა რიცხვმა 470 მიაღწია.