ისრაელში არალეგალურად მყოფ საქართველოს მოქალაქეებს ისრაელის მთავრობა შესაძლებლობას აძლევს ღირსეულად და ნებაყოფლობით დაბრუნდნენ სამშობლოში.
„საქართველოს მოქალაქეებს, რომლებიც ისრაელში არალეგალურად იმყოფებიან ან მოითხოვეს თავშესაფარი და საქართველოში ნებაყოფლობით დაბრუნება სურთ, გაეწევათ შესაბამისი დახმარება – ნათქვამია ისრაელის მოსახლეობის, იმიგრაციისა და საზღვრის დაცვის სამსახურისა და ისრაელის სახელმწიფოში საქართველოს საელჩოს ერთობლივ განცხადებაში.
იმ მოქალაქეებს, ვინც ამ ერთობლივი ინიციატივის ფარგლებში ნებაყოფლობით დაბრუნდება საქართველოში, შინ გასამგზავრებელ ავიაბილეთებს აუნაზღაურებს ისრაელის მოსახლეობის, იმიგრაციისა და საზღვრის დაცვის სამსახური;
ამასთან მათ ისრაელის სახელმწიფოში შემოსვლაზე შეზღუდვა დაუწესდებათ მხოლოდ 1 წლის ვადით. ამ ვადის გასვლის შემდეგ კი შეეძლებათ კვლავ ეწვიონ ისრაელს, როგორც ტურისტები შესაბამისი ვიზით ან შრომითი მიგრაციის შესახებ ხელშეკრულების“ ფარგლებში მიღებული სპეციალური სამუშაო ვიზით, მას შემდეგ რაც მხარეები მიაღწევენ შეთანხმებას და ხელს მოაწერენ აღნიშნულ ხელშეკრულებას;
საქართველოში დაბრუნების შემდეგ მათ მიეცემათ შესაძლებლობა ჩაერთონ რეინტეგრაციის პროგრამებში“,- ნათქვამია განცხადებაში.
განცხადებაში ასევე აღნიშნულია, რომ საქართველოში ნებაყოფლობით დაბრუნების მსურველმა მოქალაქეებმა დღეიდან, 24 ივლისიდან 30 ოქტომბრამდე განცხადებით უნდა მიმართონ ისრაელის მოსახლეობის, იმიგრაციისა და საზღვრის დაცვის სამსახურს შემდეგ მისამართზე: მიცვა კადეშის ქუჩა 64, ბნეი ბრაკი, მოსახლეობის, იმიგრაციისა და საზღვრის დაცვის სამსახურის ნებაყოფლობითი დაბრუნების დეპარტამენტი, ან ინფორმაციის მისაღებად დაუკავშირდნენ საქართველოს საელჩოს ტელ: 036093206, ელექტრონული ფოსტა: israel.cons@mfa.gov.ge