„თვითმმართველი ქალაქები და ადგილობრივი თვითმმართველობის არჩევნები“ – ამ თემაზე ზუგდიდის დემოკრატიული ჩართულობის ცენტრში დისკუსია გაიმართა, რომელსაც არასამთავრობო ორგანიზაციების, ადგილობრივი ხელისუფლების და მედიის წარმომადგენლები დაესწრნენ. შეხვედრის, რომელიც დაახლოებით სამი საათი გაგრძელდა, მიზანი იყო მოსახლეობისთვის ამომწურავი ინფორმაციის მიწოდება თვითმმართველობის წარმომადგენელთა, არასამთავრობო სექტორისა და ადგილობრივი მოსახლეობის აზრის გაგება და პრობლემის გამოსავლის მოძებნა. ექსპერტის, ირაკლი მელაშვილის შეფასებით, ზუგდიდისთვის თვითმმართველი ქალაქის სტატუსის გაუქმებით პრიორიტეტის სწორად დაგეგმვა ვერ მოხდება, რაც მომსახურების ხარისხის შემცირებას გამოიწვევს.
შეხვედრის მონაწილე ოპოზიციური პარტიის წარმომადგენლების შეფასებით, ზუგდიდისთვის თვითმმართველი ქალაქის სტატუსის გაუქმებით ქალაქს განვითარების შესაძლებლობა წაართვეს.
ქალაქ ზუგდიდის საკრებულოს თავმჯდომარის მოადგილის თაზო ფაცაციას განცხადებით, ადგილობრივ ხელისუფლებას სხვა არჩევანი არ ჰქონდა და შესაბამისად მათ მხარი დაუჭირეს რაიონის და ქალაქის გაერთიანებას. ამასთან, მისივე განცხადებით, აღნიშნული ცვლილებებით ზუგდიდისთვის თვითმმართველი ქალაქის სტატუსის გაუქმება არ არის მოსალოდნელი.
აღნიშნულ განცხადებას შეხვედრის ორგანიზატორებთან ერთად არ დაეთანხმნენ მესამე სექტორის წარმომადგენლები. არასამთავრობო ორგანიზაცია „საუნჯეს“ წარმომადგენლმა ეგნატე შამუგიამ რაიონის და ქალაქის გაერთიანების უარყოფით მხარეებზე ისაუბრა.
შეხვედრა ადამიანის უფლებათა და სოციალური სამართლიანობის დაცვის ცენტრი პროექტის – “თვითმმართველობების შენარჩუნებისა და გაძლიერების ხელშეწყობა” ფარგლებში და ინტერენეტგამოცემა TSpress.ge-სთან ერთად, ფონდ “ღია საზოგადოება-საქართველოს” მხარდაჭერით განხორციელდა.