საქართველოს ფეხბურთის ფედერაციის ყოფილი პრეზიდენტი ზვიად სიჭინავა ფეისბუქის საკუთარ გვერდზე პოსტს აქვეყნებს, სადაც წერს, რომ ზუგდიდის ბოტანიკური ბაღის ტბისთვის შეძენილი გედები მოსკოვის აეროპორტშია და მას არც ქუთაისის და არც ბათუმის აეროპოტები არ ღებულობს. ზვიად სიჭინავა სოციალურ ქსელში წერს, რომ ყველა საჭირო დოკუმენტაცია წესრიგში აქვს, ამასთან ის ფეისბუქზე ფოტოებსაც აქვეყნებს.
„ბოტანიკური ბაღის დასუფთავებით სამუშაოებსა და კეთილმოწყობაზე უარი ჩემს გეგმებს ბევრად ვერ შეცვლის. მე ვრჩები რიგით ზუგდიდელად, რომელიც ძალიანაა მოწადინებული, დაუბრუნდეს მშობლიურ ქალაქს ძველი იერსახე.
გედები, რომელიც ბოტანიკური ბაღის ტბისთვის შევუკვეთე, უკვე მოსკოვის აეროპორტშია, თუმცა, სამწუხაროდ მისი გადმოგზავნა ვერ ხერხდება. უცნაურია, ყველა საჭირო დოკუმენტი წესრიგში გვაქვს, მაგრამ არც ქუთაისის და არც ბათუმის აეროპორტი ,,ტვირთს“ არ ღებულობს. როგორც ამბობენ , საქართველომ ტვირთი რომ მიიღოს, ზოოპარკის მოთხოვნა სჭირდებათ.
საბუთები ჩემს სახელზეა შედგენილი, გედები კი გალიაში რომ დიდხანს ვერ გაძლებენ მოგეხსენებათ…
ჩემო ზუგდიდელებო, ბოდიშს გიხდით დაგვიანებისთვის. გედები მაინც ჩამოვლენ საქართველოში და ზუგდიდის ბოტანიკური ბაღიც მალე დაიბრუნებს ძველ სახეს“- წერს საქართველოს ფეხბურთის ფედერაციის ყოფილი პრეზიდენტი ზვიად სიჭინავა, რომელმაც ცოტა ხნის წინ განაცხადა, რომ ქალაქ ზუგდიდის მერობისთვის ბრძოლას აპირებს, თუმცა მას ამ დრომდე არ დაუკონკრეტებია დამოუკიდებლად აპირებს ბრძოლას თუ რომელიმე კონკრეტული პარტიის სახელით.