მას შემდეგ, რაც ზუგდიდის ბოტანიკურ ბაღს რეაბილიტაცია ჩაუტარდება, იქ შესვლა შესაძლოა ფასიანი გახდეს. ამის შესახებ ქალაქ ზუგდიდის მერმა ირაკლი გოგოხიამ მერიაში ბაღის რეაბილიტაციასთან დაკავშირებით გამართული საჯარო შეხვედრის შემდეგ განაცხადა. ქალაქის პირველი პირის ინფორმაციით, ჯერ დაზუსტებული არ არის თუ რა საფასურის გადახდა მოუწევს ბაღის დასათვალიერებლად შესულ პირს, თუმცა მისივე თქმით, შემოსული თანხა მთლიანად ბოტანიკური ბაღის მოვლა-პატრონობას მოხმარდება.
ქალაქ ზუგდიდის მერის თქმით, რეაბილიტაციის შემდეგ ზუგდიდის ბოტანიკური ბაღი პირვანდელ სახეს დაუბრუნდება, ამასთან, ირაკლი გოგოხიას თქმით, სამუშაოების მიმდინარეობისას გარემოზე მავნე ზემოქმედება მინიმუმამდე იქნება დაყვანილი.
პროექტი მუნიციპალური განვითარების ფონდის მიერ, რეგიონული და მუნიციპალური ინფრასტრუქტურის განვითარების პროექტის (RMIDPS) ფარგლებში ხორციელდება. მას მსოფლიო ბანკი აფინანსებს.