თურქეთში ავტოავარიის შედეგად დაშავებული 60 წლის კაცის მდგომარეობა კრიტიკულია. ის გერასუნის საავადმყოფოში ხელოვნური სუნთქვის აპარატზეა მიერთებული.

 

ცოტა ხნის წინა დაშავებულის ახლობლებს მკურნალი ექიმი შეხვდა. "ექიმმა გვითხრა, რომ გადარჩენის შანსი თითქმის არ არსებობს. მას განუვითარდა ძლიერი სისხლჩაქცევები, აქედან გამომდინარე შესაძლებელია, უახლოეს პერიოდში იგი აპარატიდან გამორთონ. ექიმმა უკვე მოგვისამძიმრა,"- განაცხადა დაშავებულის ახლობელმა.

 

ამ დრომდე თურქეთის სამ საავადმყოფოში საქართველოს 5 მოქალაქე რჩება სამკურნალოდ.

 

უკვე დაიკითხა ავტობუსში მყოფი ყველა პირი. 

 

ავარიის დროს დაშავებულთა ნაწილი საქართველოში გუშინ და გუშინწინ დაბრუნდა.

 

ავტობუსი, რომელსაც "ერისიონთან" არსებული ცეკვის ანსამბლი "ლამპრები" ბულგარეთში გადაჰყავდა, 16 ივლისს, გამთენიისას გზაზე ამოტრიალდა. ავტობუსში 38 ადამიანი, მათ შორის 26 ბავშვი იყო.