საქართველოში დღეს უკრაინის პრეზიდენტი ჩამოდის. ეს პრეზიდენტ პეტრო პოროშენკოს პირველი ოფიციალური ვიზიტია საქართველოში.
პეტრო პოროშენკოს მეუღლესთან და სახელმწიფო დელეგაციასთან ერთად, თბილისში დღის მეორე ნახევარში ელოდებიან.
საქართველოს პრეზიდენტის სასახლეში საპატიო სტუმრის დახვედრის ოფიციალური ცერემონია ხვალ იგეგმება, რის შემდეგაც ორი ქვეყნის პრეზიდენტები ერთმანეთს პირისპირ და გაფართოებულ ფორმატში შეხვდებიან. გაფართოებული შეხედრის შემდეგ პრეზიდენტები ქართველი და უცხოური მედიის წამომადგენლებისათვის განცხადებებს გააკეთებენ და მათ შეკითხვებს უპასუხებენ. პრესკონფერენციამდე სასახლეში ორმხრივ დოკუმენტზე ხელმოწერის ცერემონია გაიმართება.
პრეზიდენტის ადმინისტრაციის მერ გავრცელებული ცნობით, ხვალ პეტრო პოროშენკო საქართველოს პრეზიდენტთან ერთად სოფელ ხურვალეთში საოკუპაციო ხაზს ეწვევა.
სახელმწიფო ვიზიტის ფარგლებში, იგეგმება პეტრო პოროშენკოს შეხვედრები პრემიერმინისტრთან და საქართველოს პარლამენტის თავმჯდომარესთან.
უკრაინის პრეზიდენტი, სახელმწიფო დელეგაციის შემადგენლობაში მყოფ უკრაინელ ბიზნესმენებთან ერთად, საქართველო – უკრაინის ბიზნესფორუმის მუშაობაში მიიღებს მონაწილეობას. სახელმწიფო ვიზიტის ფარგლებში პეტრო პოროშენკო 19 ივლისს სვანეთს და აჭარას ესტუმრება. ბათუმში უკრაინის პრეზიდენტი აჭარის ავტონომიური რესპუბლიკის მთავრობის თავმჯდომარეს ზურაბ პატარაძეს შეხვდება.
პეტრო პოროშენკო გიორგი მარგველაშვილთან ერთად საქართველო – უკრაინის საინვესტიციო ფორუმს გახსნის და მის მუშაობაში მიიღებს მონაწილეობას.
სახელმწიფო ვიზიტის ფარგლებში, პეტრო პოროშენკო სვანეთსა და აჭარას ესტუმრება.
.