გაიზრდება თუ არა გაზის სამომხმარებლო ტარიფი თბილისსა და რეგიონებში?

 

 დღეს სემეკის" სხდომაზე  ტრანსპორტირების კომპანიისათვის გაზის ტარიფის შესაძლო ზრდაზე მსჯელობენ.

 

საქართველოს ენერგეტიკის და წყალმომარაგების მარეგულირებელი ეროვნული კომისიის წევრები ამბობენ, რომ ტარიფი 2000 წლიდან არ გადახედილა, თუმცა კომისიის წევრი გოჩა შონია წინასწარი პროგნოზისგან თავს იკავებს.

შონია ამბობს, რომ საკითხზე მსჯელობა აუცილებელია, რადგან წლების განმავლობაში შეიცვალა პირობები და ასევე შეიცვალა ტარიფის სტრუქტურაც.

 

„ტრანსპორტირების კომპანიას რაც შეეხება, მისი ტარიფი არ გადათვლილა გაცილებით უფრო დიდი ხნის განმავლობაში, დაახლოებით 2000 წლიდან. რაც შეეხება სამომხმარებლო ტარიფებს, მინდა გითხრათ, რომ ასევე არ გადახედილა ამ გამანაწილებელი კომპანიებისთვის ტარიფები დაახლოებით ათი წელია. შესაბამისად, რა თქმა უნდა, ამ ტარიფების სტრუქტურა შეიცვალა ამ წლების განმავლობაში, რადგან შეიცვალა ზოგადად პირობები,“ – აცხადებს გოჩა შონია.

 

ენერგეტიკისა და წყალმომარაგების მარეგულირებელი კომისია ბუნებრივი აირის სამომხმარებლო ტარიფზეც იმსჯელებს. საუბარია, როგორც თბილისის ასევე, რეგიონებისთვის მიმწოდებელ კომპანიებზე.

დღეს მოქმედი ტარიფის მიხედვით, ფიზიკური პირები 1 კუბურ მეტრ ბუნებრივ აირში 45,6196 თეთრს იხდიან, იურიდიული პირები – 75 თეთრს.