დილიდან ხმაური და დაპირისპირებაა ფოთში. – სავაჭრო ცენტრში გაჩენილი ხანძრის შედეგად დაზარალებულებმა ქალაქის შესასვლელში საპროტესტო აქცია გამართეს და ცენტრალური გზა და ხიდი გადაკეტეს.
მოვაჭრეები ხელისუფლებას და ბაზრის ადმინისტრაციას ზარალის ანაზღაურებას სთხოვენ.
ადგილზე მობილიზებულები იყვნენ საპატრული და კრიმინალური პოლიციის ბრიგადები. ისინი აქციის მონაწილეებს გზის გახსნისკენ მოუწოდებდნენ, მაგრამ როცა მოწოდებამ ვერ გაჭრა, გზის გახსნა ძალისმიერი მეთოდით სცადეს,რასაც დაპირისპირება მოჰყვა. რამდენიმე დაზარალებული შეუძლოდ გახდა, რის გამო სასწრაფო-სამედიცინო დახმარების ბრიგადა გამოიძახეს.
ადგილზე იმყოფებოდა ქალაქის ვიცე-მერი ლევან ჩოჩია. მისი განცხადებით ხელისუფლება მუშაობს კონკრეტულ გეგმაზე, თუ რა სახით შეიძლება ამ ადამიანებს გაეწიოთ დახმარება. მისივე ინფორმაციით, მოლაპარაკებები საბანკო სექტორის წარმომადგენლებთანაც მიმდინარეობს, რათა დაზარალებულებს შეღავათები გაეწიოთ.
დაზარალებული მოვაჭრეები ხელისუფლებისგან და ბაზრის ადმინისტრაციისგან ფულად კომპენსაციებს უკვე კვირაზე მეტია, ითხოვენ. მოთხოვნების დაუკმაყოფილებლობის შემთხვევაში, პროტესტის გაგრძელებას გეგმავენ