ანაკლიაში „GEM Fest-2017“ დაწყებამდე, შინაგან საქმეთა მინისტრის მოადგილემ, მერაბ მალანიამ ჩაატარა სამუშაო შეხვედრა ფესტივალის უსაფრთხოების საკითხებზე
შეხვედრას ესწრებოდნენ აშშ-ს ანტინარკოტიკული და სამართალდამცავ ორგანოებთან ურთიერთობის საერთაშორისო ბიუროს (INL) წარმომადგენელი მაიკ ტერნერი, ფესტივალების დაგეგმარებისა და კოორდინაციის ექსპერტი პატრიკ სმიტი, შსს-ს სხვადასხვა დანაყოფის თანამშრომლები, სამეგრელო-ზემო სვანეთის გუბერნატორის ადმინისტრაციის წარმომადგენლები და „GEM Fest-2017“-ის ორგანიზატორები,
მერაბ მალანიამ ამერიკელ ექსპერტებს გააცნო ფესტივალის უსაფრთხოების გეგმა, რომელშიც ჩართული არიან შსს-ს საგანგებო სიტუაციების მართვის სააგენტო, საპატრულო პოლიციის, კრიმინალური პოლიციის და დაცვის პოლიციის დეპარტამენტები, მიაწოდა ინფორმცია საპოლიციო ძალების გადანაწილების, შსს-ს სტრუქტურულ დანაყოფებს შორის კოორდინაციის სქემაზე და დაათვალიერებინა ფესტივალისთვის განსაზღვრული ტერიტორია.
შსს-ს განსაკუთრებულ დავალებათა დეპარტამენტი წარმოადგენს მთავარ სტრუქტურულ ერთეულს, რომელიც პასუხისმგებელია ელექტრონული მუსიკის საერთაშორისო ფესტივალის უსაფრთხოების დაგეგმვასა და ღონისძიების განმავლობაში შსს-ს სტრუქტურული ერთეულების კოორდინირებული მოქმედების უზრუნველყოფაზე.
დეპარტამენტი უკვე მეორე წელია ელექტრონული მუსიკის საერთაშორისო ფესტივალის უსაფრთხოების ღონისძიებების დაგეგმვას უზრუნველყოფს.