სოფელ ხამისკურში, ურთის მთის სიახლოვეს მცხოვრები 8 ოჯახი ერთ კვირაზე მეტია გარესამყაროსაა მოწყვეტილი. გასულ კვირას, კოკისპირული წვიმების შედეგად სოფლის და ცენტრალური გზის დამაკავშირებელი მონაკვეთი დაზიანდა. ადგილობრივების განცხადებით, მთიდან წამოსულმა წყალმა საავტომობილო ხიდი, ხოლო მეწყერმა და მთიდან ჩამოტანილმა ქვა-ღორღმა საავტომობილო გზა მთლიანად დაფარა.
დაზიანებული ხიდი სოფელ ხამისკურში. ფოტო: ODISHINEWS
ამჟამად, სოფელ ხამისკურში, აღნიშნულ ტერიტორიაზე საავტომობილო მოძრაობა შეუძლებელია. ადგილობრივი მცხოვრების, გიორგი აფაქიძის განცხადებით, თუ სასწრაფო ღონისძიებები არ გატარდა და სპეციალური სამუშაოები არ განხორციელდა, სოფლის შიდა გზა მთლიანად დაიგრევა.
დაზიანებული შიდა გზა სოფელ ხამისკურში. ფოტო: ODISHINEWS
დაზიანებული შიდა გზა სოფელ ხამისკურში. ფოტო: ODISHINEWS
„ცუდად რომ გახდეს ვინმე და სასწრაფოს დახმარება გახდეს საჭირო, ექიმები აქ ვერ ამოვლენ. გარდა ამისა, გვყავს მცირეწლოვანი ბავშვები, რომლებიც დილა-საღამოს ფეხეთ დაგვყავს ამ დანგრეული გზის საშუალებით“ – ამბობს სოფელ ხამისკურის მკვიდრი გიორგი აფაქიძე.
გიორგი აფაქიძის თქმით, ხამისკურის ტერიტორიაზე განთავსებულია უმსხვილესი კომპანიების – მაგთის, ჯეოსელის და ბილაინის, ასევე რადიო „ათინათის“ გადამცემი ანძები. ადგილობრივების თქმით, კომპანიის თანამშრომლებს თითქმის ყოველდღიურად უწევთ ამ გზით გადამცემებამდე მისვლა. ისინი აღნიშნულ კომპანიებს მიმართავენ, საგზაო ინფრასტრუქტურის მოწესრიგებაში სოფელს დაეხმარონ, წინააღმდეგ შემთხვევაში შესაძლოა გზის პიკეტირებასაც მიმართონ.
გარდა ამისა, მოსახლეობა ამბობს, რომ ორი წლის კომპანია „სილქნეტმა“ სოფელში ოპტიკურ-ბოჭკოვანი კაბელები გაიყვანა. ადგილობრივების თქმით, სამუშაოები კომპანიამ არასწორად ჩაატარა, რამაც გზის დაზიანება გამოიწვია. გიორგი აფაქიძის თქმით, მიუხედავად იმისა, რომ სილქნეტმა სამუშაოები დაასრულა, მის მიერ გაყვანილი ოპტიკურ-ბოჭკოვანი კაბელები ზოგ ადგილას დაფარული არ არის, ერთგან კი საერთოდ დაზიანებული ხიდის ქვეშ გადის.
ODISHINEWS
ODISHINEWS
გიორგი აფაქიძის თმით, პრობლემის გახმოვანების შემდეგ სოფელში კომპანია ბილაინის წარმომადგენლები მივიდნენ. მისივე თქმით, ადგილზე იმყოფებოდნენ რადიო „ათინათის“ წარმომადგენლებიც. გარდა ამისა, ადგილობრივების თქმით, დაიწყეს ხელმოწერების შეგროვება გზის მოწესრიგების მოთხოვნით. გიორგი აფაქიძის თქმით, ამ მომენტისთვის 62 ხელმოწერა აქვთ.
სოფელ ხამისკურის გამგებლის, ავთანდილ ქირიას თქმით, მუნიციპალიტეტის გამგეობაში შექმნილია სპეციალური კომისია, რომელმაც უკვე გააკეთა სპეციალური აღწერა და სარეაბილიტაციო სამუშაოებს უახლოეს მომავალში დაიწყებს.