ანაკლიაში პირველი ბიზნეს ფესტივალი „ანაკლიობა 2017“ ოფიციალურად გაიხსნა. ღონისძიებაზე ადგილობრივმა და საქართველოს სხვადასხვა რეგიონიდან ჩამოსულმა მეწარმეებმა საკუთარი პროდუქცია წარმოადგინეს. 50-მდე კომპანიას სპეციალურად მოწყობილ პავილიონებში საკუთარი წარმოების პროდუქცია ჰქონდა გამოფენილი. ჩაი, ღვინო, ხელნაკეთი ნივთები, ნაყინი, ტანისამოსი, ყველიანი კვერები – ანაკლიის პირველი ბიზნესფესტივალი მრავალფეროვნებით გამოირჩეოდა. ფესტივალი მიზნად ტურიზმის განვითარებას და ახალი სამუშაო ადგილების შექმნას ისახავს.
ანაკლიის პირველ ბიზნესფესტივალში ადგილობრივი ხელისუფლების წარმომადგენლებმაც მიიღეს მონაწილეობა. ფესტივალს სამეგრელო-ზემო სვანეთის სამხარეო ადმინისტრაცია, ზუგდიდის მუნიციპალიტეტი და უესეიდის პროექტი ზრდა ერთობლივად ახორციელებენ.
ანაკლიის ბიზნესფესტივალს საფუძველი წელს ჩაეყარა და ამიერიდან ის ყოველწლიურად გაიმართება.