დასრულდა „საქართველოს პატრიოტთა ალიანსის“ წევრების ვიზიტი მოსკოვში. ცოტა ხნის წინ, ქართველი დეპუტატები თბილისში ჩამოფრინდნენ.
„პატრიოტთა ალიანსის“ წევრი, ადა მარშანია, რომელიც პარტიის წარმომადგენლებთან ერთად დუმაში რუს დეპუტატებს შეხვდა, აცხადებს, რომ მოლაპარაკებების დროს სამმხრივი დიალოგის ინიციატივა გაჩნდა. ახალი ფორმატი საქართველო-ნატო-რუსეთის მოლაპარაკებების მაგიდასთან დაჯდომას ითვალისწინებს.
ადა მარშანიამ კიდევ ერთხელ აღნიშნა, რომ რუსეთთან ურთიერთობის დალაგებაში საქართველოს ოკუპაციის შესახებ კანონი უშლის. დეპუტატი აცხადებს, რომ საქართველოს პარლამენტს ამ საკითხზე სამუშაო ჯერ კიდევ ბევრი აქვს, რათა ცვლილებები განხორციელდეს.
„პატრიოტთა ალიანსის“ წევრი ასევე განმარტავს, რომ მოლაპარაკებების მთავარი საკითხი მოქალაქეების მიერ წინაპრების საფლავების მოსანახულებლად ნების დართვა იყო.
მისი თქმით, შეთანხმების შედეგად ასევე "პილოტებისთვის გაუქმდება ვიზები და საზოგადოებას ერთგვარ შენგენს“ შესთავაზებენ.
შეგახსენებთ, რომ "პატრიოტთა ალიანსის" წევრები ვლადიმირ პუტინის "ედინაია რასიას" და "კომუნისტური" პარტიის წარმომადგენლებს შეხვდნენ. მათ რუს დეპუტატებთან საუბრისას ყურადღება ოკუპაციის პროცესის თაობაზე არ გაუმახვილებიათ..