ბათუმის რეფერალური საავადმყოფოს ეზოში აქ გარდაცვლილი პაციენტის ოჯახის წევრები და ახლობლები არიან შეკრებილი და ქირურგ ზურაბ ჩიხლაძისა და ყველა იმ პირის პასუხისგებაში მიცემას ითხოვენ, ვის პროფესიულ გულგრილობასა და უყურადღებობასაც შეეწირა მათი აზრით 34 წლის ახალგაზრდა ქალის სიცოცხლე.
აქციის მონაწილეების თქმით, პაციენტმა ჭარბწონიანობის გამო კუჭზე ოპერაცია ორი თვის წინ გაიკეთა და მას შემდეგ მისი მდგომარეობა დღითიდღე უარესდებოდა. გარდაცვლილის ოჯახის წევრები ვარაუდობენ, რომ ექიმებმა ოპერაციის დროს საყლაპავი მილი დააზიანეს და პაციენტს დრენაჟიც არასწორად ჰქონდა გაკეთებული.
მათივე თქმით, 34 წლის ქალბატონი უგონო მდგომარეობაში დიაგნოზის გარეშე ბოლო რამდენიმე დღეა საავადმყოფოში აპარატზე იყო მიერთებული. გარდაცვლილის ოჯახის წევრების განცხადებით, მისი თბილისში გადაყვანა ორჯერ სცადეს, თუმცა უშედეგოდ, პაციენტთან არც მოწვეულ ექიმს უშვებდნენ.