ქართული მედია და სოციალური ქსელი აღშფოთებით გამოეხმაურა გუშინ მატროსოვის ციხეში კრიმინალური პოლიციის ყოფილი მაღალჩინოსნის ირაკლი ფირცხალაბვას ცემის ფაქტს, ადვოკატები და ოჯახის წევრები ცემაში მთავარი პროკურატურის პროკურორს, ადანაშაულებენ. ისინი ეყრდნობიან ამავე საპატიმროში მყოფი ასევე ყოფილი მაღალჩინოსნის გიორგი ცააძის შეტყობინებას, რომელიც ოჯახს მიაწოდა.
შსს თბილისის საქალაქო სასამართლომ მატროსოვის ციხეში მომხდარ ინცინდენტზე განცხადება გუშინ ცხელ კვალზე გააკეთა.
განცხადებას უცვლელად გთავაზობთ:
„თბილისის საქალაქო სასამართლოს საგამოძიებო და წინასასამართლო სხდომის კოლეგიამ დააკმაყოფილა ბრალდების მხარის შუამდგომლობა მოწმის სახით ირაკლი ფირცხალავას მოსამართლის წინაშე დაკითხვის თაობაზე. მოწმეზე ზემოქმედების ფაქტზე მიმდინარე გამოძიების ფარგლებში ირაკლი ფირცხალავამ უარი განაცხადა მოწმის სახით გამოკითხვაზე. ირაკლი ფირცხალავას ჯანმრთელობის მდგომარეობის გათვალისწინებით, დახურული სასამართლო სხდომა სასჯელაღსრულების N9 დაწესებულებაში გაიმართა. სხდომის გახსნისთანავე დასაკითხმა პირმა სასამართლოს განუცხადა, რომ პროტესტის უკიდურეს ფორმას – შიმშილობას უკვე მეოთხე დღეა მიმართავს და ადვოკატის გარეშე ჩვენების მიცემაზე უარი განაცხადა. ირაკლი ფირცხალავას მიეცა ოჯახთან სატელეფონო კომუნიკაციის საშუალება მისი ადვოკატით უზრუნველყოფის მიზნით. აღნიშნულის შემდეგ მოწმის სახით დასაკითხი პირი შეუძლოდ გახდა და პირველადი სამედიცინო დახმარება მას სასწრაფო დახმარების ბრიგადამ აღმოუჩინა. ფირცხალავას ჯანმრთელობის მდგომარეობის გათვალისწინებით, სხდომა პირის დაკითხვის გარეშე დასრულდა.“
განცხადებაში არაფერია ნათქვამი ფიზიკურ ანგარიშსწორებაზე, ამით იგი ირიბად უარყოფს მომხდარ ინცინდენტს, რაც არანაირ თანხვედრაში არ მოდის გავრცლებულ ინფორმაციას ფიცხალავას ცემის შესახებ.