ორდღიანი ძებნის შემდეგ მაშველებმა გონიოში, ზღვაში დაკარგული 25 წლის მამაკაცის ცხედარი იპოვეს. მისი პოვნა დღეს დილამდე ვერ მოხერხდა.
პარალელურად, გრძელდება 45 წლის მამაკაცის სამძებრო სამუშაოები, რომელიც ბათუმში ზღვაში 3 ივლისს გაუჩინარდა. მას მთელი ეს დღეები უშედეგოდ ეძებენ.
გავრცელებული ინფორმაციით, სავარაუდოა ეს ადამიანი უფლებადამცველის, თამაზ ბაკურიძის ძმა კობა ბაკურიძე იყოს, რომელიც ასევე 3 ივლისს გაუჩინარდა.
დღეს თამაზ ბაკურიძემ ძმის გაუჩინარებასთან დაკავშირებით საგამოძიებო ორგანოს ჩვენება მისცა. იგი ბულვარის ტერიტორიაზე დამონტაჟებული ვიდეოკამერებიდან ჩანაწერების ამოღებას ითხოვს.
როგორც ბაკურიძემ განაცხადა, თვითმხილველებმა მისი ძმის გაუჩინარებაზე სხვადასხვა ვერსიები მიაწოდეს. მისივე თქმით, სანაპიროზე დატოვებული ფეხსაცმელი კობა ბაკურიძეს არ ეკუთვნის.
"გუშინ საღამოს, ანბანის კოშკის მიმდებარე ტერიტორიაზე ვიმყოფებოდით, როდესაც ვიღაც ქალბატონი მოვიდა და გვითხრა, რომ მან ჩემი ძმა, კობა დაინახა. ქალბატონის ინფორმაციით, კობა ანბანის კოშკის მიმდებარედ წყალში შევიდა და სასტუმრო "შერატონის" მიმართულებით მიცურავდა. როგორც იგი ამბობს, არანაირი საფრთხე არ შეუმჩნევია. . ქალბატონის საუბრისას ახალგაზრდა მამაკაციც მოვიდა და განსხვავებული ვერსია გვითხრა. მამაკაცის ინფორმაციით, კობა იმავე დღეს საღამოს ცხრის ნახევრისთვის ბულვარში, შაუმიანის ქუჩაზე გადაადგილდებოდა და მაისური და ფეხსაცმელი არ ეცვა. კობას მაისური ნამდვილად არ ეცვა, რადგან ავტომობილში ჰქონდა დატოვებული.
ვინაიდან მაშველებისა და ამ მამაკაცის ნათქვამი არ ემთხვევა, ამიტომ საგამოძიებო ორგანოებს ბულვარის ტერიტორიიდან ვიდეომასალების ამოღებას ვთხოვთ, სად გადაადგილდებოდა და შევიდა თუ არა მეორედ ზღვაში?! კითხვები გაჩნდა და ბუნებრივია, პასუხი უნდა გაეცეს.
კობამ სანაპიროზე ორი ნივთი – ავტომობილის გასაღები და ფეხსაცმელი დატოვა. თავდაპირველად ვიფიქრე, რომ ფეხსაცმელი ნამდვილად მას ეკუთვნოდა, თუმცა, აღმოჩნდა, რომ ზომაც არ ემთხვევა. მას ნამდვილად არ ეკუთვის ეს ფეხსაცმელი. ამავდროულად, ძალიან მოძველებული იყო, რომელსაც კობა არ ჩაიცვამდა“, – განაცხადა ბაკურიძემ.
საქართველოს შინაგან საქმეთა სამინისტროს ინფორმაციით, ფაქტზე გამოძიება სსკ-ის 115-ე მუხლით დაიწყო, რაც თვითმკვლელობამდე მიყვანას გულისხმობს.