"ხალხი გაუბედურებულია და მიტოვებული. არავინ არ ინტერესდება რა ხდება სოფლის თავს. პურის ყანები რუსებმა მიიტაცეს. ვერ ვიღებთ მოსავალს. გვეშინია, რომ ასეთი უპატრონობის ჟამს რუსები სოფელში არ შემოვიდნენ" – ამბობენ სოფელ ბერშუეთის მცხოვრებლები და ხელისუფლებას საოკუპაციო ძალების თავნებობისგან დაცვას სთხოვენ.
როგორც ცნობილია, ე.წ. საზღვარი, რომელიც ოკუპანეტებმა ორი დღის წინ 400-500 მეტრით გადმოწიეს, სოფლის ბაღებს ორად ჰყოფს. განსაკუთრებით დაზარალდა რამდენიმე კონკრეტული ოჯახი, მათ შორის ფერმერი გია გია ხოდელი, რომელივ ვეღარ შეაღწევს ახალ საზღვრებში – ცხინვალის დე ფაქტო მხარეს მოქცეულ თავის ყანასა და ბაღში და მოსავალს ვერ აიღებს. მან გაიზიარა არაერთი იქაური მცხოვრების ბედი. რომელთა სავარგულები სადაც მოსავალი უნდა აეღოთ, ოკუპანტებმა შარშან მოაქციეს ე.წ. საზღვრის მიღმა. ამ ორი წლის განმავლობაში ხოდელმა ჯამში, 20 ჰექტარი მიწა დაკარგა. ბერშუეთელი გლეხები და მიწის მეპატრონეები შიშობენ, რომ დროთა განმავლობაში საოკუპაციო ხაზთან მდებარე მიწის ნაკვეთები მთლიანად დაიკარგება.
არის სხვა პრობლემაც. ავღანეთის სამშვიდობო ოპერაციაში დაღუპული ქართველის, ალექსანდრე კვიწინაძის ოჯახის წევრები ამბობენ, რომ რუსი ოკუპანტები სასაფლაოდან ერთ კილომეტრში იმყოფებიან და სავსებით მოსალოდნელია, რომ თუ ასე გაგრძელდა სასაფლაო სადაც ქართველი სამხედროა დაკრძალული. ოკუპანტების საზღვრებს მიღმა მოექცეს, ამიტომ ისინი ცხედარის გადმოსვენებაზე ფიქრობენ.
საქართველოს სახელმწიფო უსაფრთხოების სამსახურის მიერ გავრცელებულ განცხადებაში კი ნათქვამია, რომ ,,აღნიშნული წარმოადგენს ე.წ. ბორდერიზაციის უკანონო პროცესის გაგრძელებას, რომელიც არა მარტო ზღუდავს ადგილობრივი მაცხოვრებლების ფუნდამენტურ უფლებებს, არამედ პირდაპირპროპორციულად აზიანებს უსაფრთხოების გარემოს ადგილზე. ამიტომ საკითხი ერგნეთში, ინციდენტების პრევენციის და მათზე რეაგირების სამუშაო ჯგუფების დაგეგმილ შეხვედრაზე, 11 ივლისს განიხილება. ''
ეს ვერაფერი ნუგეშია ბერშუეთის მოსახლეობისათვის.