პრემია „ელექტრონავტი": საქართველოში საუკეთესო დიჯეები დააჯილდოეს.
ნომინაციაში ,, 2016 წლის ელექტრონავტი და წლის საუკეთესო აუდიოტრეკის ავტორი'' გაიმარჯვა ზუგდიდელმა მუსიკოსმა მამუკა ცხადაიამ , რომელიც ელექტრონული მუსიკის სფეროში ჰამაცუკის (Hamatsuki) სახელით არის ცნობილი.
ქართული ელექტრონული მუსიკის და ინოვაციური პოპ-კულტურის წარმომადგენლებს პრემია „ელექტრონავტი"(Electronauts 2016) წელს მეცხრედ გადაეცა, დაჯილდოების ცერემონია თბილისის კლუბ Spacehall-ში 25 ივნისს გაიმართა.
გამარჯვებულები გამოვლინდნენ 10 ნომინაციაში : წლის დიჯეი, წლის ვიზუალური არტისტი, წლის ცოცხალი შესრულება, წლის საუკეთესო ვიდეო, წლის ფესტივალი, წლის ლეიბლი, წლის ტრეკი, წლის ალბომი, წლის აღმოჩენა და „ელექტრონავტი 2016".
მუსიკალური პრემია „ელექტრონავტი 2016"-ის მხარდამჭერები არიან საქართველოს კულტურისა და ძეგლთა დაცვის სამინისტრო, თბილისის მერია და „თიბისი ბანკი".
ელექტრონული მუსიკისა და ინოვაციური პოპკულტურის ყოველწლიური ფესტივალი 2008 წელს დაარსდა და მიზნად ისახავს ნიჭიერი ახალგაზრდა ქართველი არტისტების გამოვლენას. გამარჯვებულები ჯილდოებს იმ კონტენტისთვის იღებენ, რომელსაც ბოლო ერთი წლის განმავლობაში ქმნიან.
„ელექტრონავტის" ისტორია 2005 წელს დაიწყო, როდესაც ცნობილმა ქართველმა პროდიუსერმა და მუსიკოსმა სერგი გვარჯალაძემ ელექტრონული მუსიკის თანამედროვე შემსრულებლებზე დოკუმენტური ფილმი გადაიღო. სურათმა დიდი რეზონანსი გამოიწვია და საქართველოში ამ სფეროში მუსიკალური პრემიის შექმნას ერთგვარი ბიძგი მისცა. 2010 წელს მუსიკალური პრემიის ჟიური საერთაშორისო გახდა.
ახალგაზრდა ქართველი ელექტრონული მუსიკოსების საქმიანობის მხარდაჭერისა და წახალისების მიზნით, 2011 წელს იმავე სახელწოდების ფონდიც შეიქმნა.