საზოგადოებრივი დარბაზი "აფხაზეთის" წარმომადგენლები მათ მიერ შემუშავებული ათპუნქტიანი რეზოლუციის შესრულებას 15 ივლისამდე ითხოვენ. ამის შესახებ მათ დღეს ზუგდიდის დემოკრატიული ჩართულობის ცენტრში მედიისთვის გამართულ ბრიფინგზე განაცხადეს. საზოგადოებრივი დარბაზის ხელმძღვანელის, დემურ სოტკილავას განცხადებით, მათ მიმართეს საქართველოს მთავრობას, პარლამენტს, ლტოლვილთა და განსახლების სამინისტროს, აფხაზეთის ავტონომიური რესპუბლიკის მთავრობას დევნილთა საერთო კრებაზე გაჟღერებულ ძირითად პუნქტობრივ მოთხოვნებს პასუხისმგებლობით მოეკიდონ.საზოგადოებრივი დარბაზის წევრებს მიაჩნიათ, რომ რეზოლუციის დოკუმენტში გაწერილი მოთხოვნები მინიმალურია და ხელისუფლებას ხელეწიფება მათი გადაწყვეტა. მათივე განცხადებით, ეს ის პრობლემებია, რომელიც წლების განმავლობაში გროვდებოდა და დღემდე გადაუჭრელია.იმ შემთხვევაში თუ ხელისუფლება საზოგადოებრივი დარბაზის მოთხოვნებს 15 ივლისამდე არ შეასრულებს, "აფხაზეთის" თავმჯდომარის, დემურ სოტკილავას განცხადებით, დევნილები პერმანენტულ აქციებს გამართავენ.