ზუგდიდიში, ცენტრალური ბულვარის ტერიტორიაზე არასამთავრობო ორგანიზაციებმა და სამოქალაქო აქტივისტებმა მუსიკალური ჯგუფის „ბირჟა მაფიის“ წევრების დაკავება გააპროტესტეს და მათ მხარდაჭერა გამოუცხადეს. აქციის მონაწილეების განცხადებით, ქვეყანაში თავისუფალი სიტყვის გამოხატვის მხრივ ბევრი პრობლემაა. ისინი დღეს აქციაზე სპეციალური საპროტესტო პლაკატებით იყვნენ მოსული და მოულოდნელად წამოსული კოკისპირული წვიმის მიუხედავად ქვეყანაში არსებული ნარკოპოლიტიკა გააპროტესტეს და სიტყვის თავისუფლების უზრუნველყოფა მოითხოვეს.
შეკრებილების განცხადებით, იმ შემთხვევაში თუ დაკავებულ მუსიკოსებს არ გაათავისუფლებენ, ისინი საპროტესტო აქციის გაგრძელებას არ გამორიცხავენ. პარალელურად, საქართველოს მასშტაბით, ერთიდაიგივე დროს იგივე მოთხოვნით საპროტესტო აქცია რამდენიმე ქალაქშიც გაიმართა.
მუსიკალური ჯგუფის „ბირჟა მაფიის“ წევრები მიშკა მგალობლიშვილი და გიორგი ქებურია სამართალდამცავებმა 3 დღის წინ დააკავეს. მუსიკოსების განცხადებით, მათი დაკავება მათ მიერ გადაღებულ კლიპს უკავშირდება, რომელშიც პოლიციელია გაშარჟებული. შინაგან საქმეთა სამინისტრო კი მათ დიდი ოდენობით ნარკოტიკული საშუალების შეძენა-შენახვას ედავება. თბილისის საქალაქო სასამართლომ კი გუშინ დაკავებულებს აღმკვეთი ღონისძიების სახით წინასწარი პატიმრობა შეუფარდა. ბრალის დამტკიცების შემთხვევაში მუსიკალური ჯგუფის წევრებს თავისუფლების აღკვეთა რვიდან ოც წლამდე ან უვადოდ ემუქრებათ.