საინფორმაციო სააგენტო "პირველის" ინფორმაციით, სამაუწყებლო კომპანია "რუსთავი 2"-ის საინფორმაციო სამსახურის უფროსმა გიორგი ლაფერაშვილმა თანამდებობა დატოვა. თავად გიორგი ლაფერაშვილი ამ დროისთვის საზღვარგარეთ იმყოფება და მასთან დაკავშირება ვერ ხერხდება. სატელეფონო ზარს არ პასუხობს ტელეკომპანიის გენერალური დირექტორი ნიკა გვარამია. ამ დრომდე გავრცელებული ინფორმაციაზე კომენტარს არ აკეთებენ სამაუწყებლო კომპანია რუსთავი 2-ის თანამშრომლები.
„პირველის“ ინფორმაციით, ჯერჯერობით უცნობია, გადაწყვეტილება თავად მიიღო თუ არა გიორგი ლაფერაშვილმა, თუმცა ცნობილია, რომ ტელეკომპანიაში რეორგანიზაცია მიმდინარეობს. აღნიშნულ პოზიციაზე ტელეკომპანიის ჟურნალისტები ნოდარ მელაძე და თამარ ბაღაშვილი მოიაზრებიან.
გავრცელებული ინფორმაციით, რეორგანიზაციის ფარგლებში "რუსთავი 2"-ზე რამდენიმე გადაცემა დაიხურა. ასევე, მიმდინარეობს კადრების შემცირება.
საინფორმაციო სააგენტო „ოდიშინიუსი“ ცდილობს გიორგი ლაფერაშვილთან დაკავშირებას. ჩვენი ინფორმაციით, რუსთავი 2-ის საინფორმაციო სამსახურის ხელმძღვანელი აშშ-ში იმყოფება. ლაფერაშვილის პასუხს ჩვენ მოგვიანებით შემოგთავაზებთ.