ამ წუთებში ქალაქ ზუგდიდის მუნიციპალიტეტის საკრებულოს სხდომა მიმდინარეობს.ძირითადი განსახილველი საკითხია ქ.ზუგდიდისთვის თვითმმართველი ქალაქის სტატუსის ჩამორთმევის საკითხი, რომელსაც აღშფოთებული მოსახლეობის დასაშოშმინებლად მმართველმა პარტიამ მოუძებნა სახელი – ,,მუნიციპალიტეტის გაერთიანება.''
სოციალური ქსელის მომხმარებლებს შეუძლიათ პირდაპირი ჩართვების მეშვეობით შეაფასონ, რა ხდება სხდომაზე.
,,დედა შვილს ხელში არ აიყვანს ისეთი ამბავია…. '' – ასეთ კომენტარს ურთავს ერთ-ერთი ინტერნეტმომხმარებელი ამ ვიდეოკადრებს.
სხდომაზე არსებულ დაძაბულ ვითარებას მოწმობს საკრებულოს ოპოზიციური ფრთის წარმომადგენლის ანა წითლიძის მოკლე შეტყობინებაც: ,, საკრებულოს სხდომაზე გარშემოტყმული ვართ სუსით და ძალოვნებით.''
უფრო ადრე მოსახლეობამ შენიშნა, რომ ზუგდიდის საკრებულოსთან ქართული ოცნების აქტივისტების მობილიზაცია იწყება.
საკრებულოს დღევანდელი სხდომა მოულოდნელად ჩაინიშნა ისე, რომ საკრებულოს წევრების ნაწილს ( ოპოზიციურ ფრთას) ეს მხოლოდ წარმოუდგენლად მცირე ხნით ადრე შეატყობინეს, მოსახლეობის ინფორმირება, რასაკვირველია, არ მომხდარა. მიუხედავად ამისა, საკრებულოს სხდომაზე საზოგადოების წარმომადგენლები მივიდნენ და, როგორც ჩვენს კორესპონდენტს განუცხადეს, სტატუსის შენარჩუნებისთვის ბრძოლას აპირებენ.
,,დღეს ვნახავთ საკრებულოს წევრები უმრავლესობიდან დარჩებიან ბიძინას მონებად, თუ შეძლებენ ღირსეული გადაწყვეტილება მიიღონ და მხარი არ დაუჭირონ ამ სამარცხვინო საკითხს., რაც შეეხება სხდომის სხვა მონაწილეებს – საზოგადოების წარმომადგენლებს – ვინ თქვა ზუგდიდი დააჩმორესო, აი, ნახეთ პირდაპირ ეთერში, მეგობრებო.'' – ეს კომენტარიც სოციალური ქსელიდან არის.