18 მაისს საქართველოს 20 და აშშ-ის და ევროპის 12-მდე ქალაქში,  სადაც ქართველი ემიგრანტები ცხოვრობენ, საქართველოს ეროვნული სამოსის დღე  აღინიშნება –    დაგეგმილია კოსტიუმირებული აღლუმები, გამოფენები, კონცერტები.

 

ეროვნული სამოსის დღე თბილისში ევროპის მოედანზე დაიწყება – ორგანიზატორები გეგმავენ   გაიმართოს თეატრალიზებული სანახაობა, რომელშიც გაცოცხლდება მეცხრამეტე საუკუნის თბილისი, თავისი ბაზრით, ქუჩით, სამჭედლოებით, ყარაჩოხელებით, კინტოებით, ხოლო   "შავფაროსნები", "ჩვენებურები" და სხვა ენთუზიასტები მათივე  ხარჯით გამართავენ წარმოდგენებს. ქართული კულტურის პოპულარიზაციაზე მიმართულ ამ დღესასწაულზე დიდძალ მნახველსა და მონაწილეს მოელიან, რადგან, როგორც შარშანაც აღმოჩნდა, ბევრს აქვს სახლში ეროვნული ტანისამოსი და უბრალოდ უფუნქციოდ უდევს, ეს კი კარგი შესაძლებლობა იქნება მათთვის თავი მოიწონონ და   გააცოცხლონ თავიანთი ეროვნული სამოსი.  დღესასწაუში  ჩართვის შესაძლებლობა ექნებათ  ტურისტებსაც .

 

ქართული სამოსის დღე აღინიშნება ზუგდიდშიც. როგორც  ახალგაზრდა საინიციატივო ჯგუფის "კომუნას" ხელმძღვანელი  დავით აქუბარდია ამბობს, მსვლელობა ეროვნული სამოსით მოეწყობა."ბოტანიკური ბაღის მიმდებარე ტერიტორიაზე,  ასევე,  ღონისძიებაში მონაწილეობას მიიღებენ ადგილობრივი ფოლკლორული ჯგუფები . ღონისძიება ზუგდიდის გამგეობის და მერიის მხარდაჭერით ჩატარდება. 

 

 ეროვნული სამოსის დღე საქართველოში პირველად 2016 წელს აღინიშნა. პროექტის  ავტორები, მათ შორის   ირაკლი ქოქოსაძე, "შავფაროსანი"აცხადებს, რომ მსგავსი ღონისძიებები  შარშან  13 მუნიციპალიტეტში ჩატარდა – ადგილობრივმა ეროვნული ცეკვისა და სიმღერის ანსამბლებმა წარმოადგინეს ეროვნული სამოსი  –  გაიმართა კოსტიუმირებული მსვლელობები,  კონცერტები, შეჯიბრებები სპორტის ეროვნულ სახეობებში.

 

,,იდეა, ჩაგვეტარებინა ქართული სამოსის და ქართული საბრძოლო ხელოვნების ფესტივალი, 2013 წელს გაჩნდა,  ჩავატარეთ კიდეც. ამის შემდეგ  შეიკრიბა საინიციატივო ჯგუფი, რომელმაც დაიწყო ხელმოწერების შეგროვება ეროვნული სამოსის დღის ოფიციალურ დღესასწაულად გამოცხადებისათვის.'' – ამბობს იგი.