ვინ შეასრულებს გამგებლის ან მერის მოვალეობას იმ შემთხვევაში,თუ მას პირველი მოადგილე ან მოადგილე არ ეყოლება? – ამასთან დაკავშირებით „ადგილობრივი თვითმმართველობის კოდექსში“ იგეგმება ცვლილებები, რომლითაც განისაზღვრება იმ სუბიექტთა წრე განისაზღვრება, რომლებსაც ეს დაეკისრებათ.
ცვლილების თანახმად, გამგებლის/მერის უფლებამოსილების შეჩერების ან შეწყვეტის შემთხვევაში, მის მოვალეობას უფლებამოსილების აღდგენამდე ან ახალ არჩევამდე გამგებლის/მერის პირველი მოადგილე შეასრულებს. იმ შემთხვევაში, თუ პირველი მოადგილე თანამდებობაზე დანიშნული არ არის, უფლებამოსილებას გამგებლის/მერის მოადგილე ასრულებს.
კანონპროექტით წარმოდგენილი ცვლილება პირველი მოადგილის ან მოადგილის არ არსებობის შემთხვევასაც განიხილავს, რომლის მიხედვითაც, გამგებლის/მერის უფლებამოსილების აღდგენამდე ან ახალი გამგებლის/მერის არჩევამდე, მის მოვალეობას მუნიციპალიტეტის საკრებულოს თავმჯდომარე შეასრულებს.
კანონპროექტი პარლამენტში რეგიონული პოლიტიკისა და თვითმმართველობის კომიტეტის თავმჯდომარის გრიგოლ ლილუაშვილის და დეპუტატ კობა ლურსმანაშვილის მიერ არის ინიცირებული.