ცნობილი ქართველი ბარიტონი, ვერდის ოქროს მედლის მფლობელი და მარია კალასის სახელობის სპეციალური პრემიის ლაურეატი მიხეილ ქირია, რომელიც მსოფლიო საოპერო თეატრების სცენებზე მღერის, ეხმაურება ქართველ ხელოვანთა დუხჭირი მდგომარეობით გამოწვეული უკმაყოფილების ტალღას საზოგადოებაში.
,,ამ სტატუსს ალბათ ბევრი არ მოიწონებთ, რადგან "თქვენ არ გეხებათ…"
გუშინ ჩემი მეგობარი, ერთერთი თეატრის ხელმძღვანელი მეუბნება, მიშა დაიჯერებ რომ ხელფასს არ ვიღებო? როგორ თუ არ იღებთქო? მსახიობებს იმდენად მიზერულ თანხამდე დაუყვანეს ხელფასები, საკუთარ ხელფასს ბოლო თეთრამდე მათ ვუნაწილებო!
სოლიდარობა ჩვენს მსახიობებს!'' – წერს მიხეილ ქირია თავის პირად ფეისბუქგვერდზე.
,,მარტო საქართველოში შეიძლება მოხდეს ასე…..ხელოვნება არაფრად უღირს ჩვენს მთავრობას….სირცხვილი არ არის, გამოჩენილ და წარმატებულ მსახიობებს უჭირდეთ ?! სანამ მთავრობაში არიან ( ახლაც და წარსულშიდაც) , ასწრებენ თავიანთთვის… – ეს ერთერთია უამრავი გამოხმაურებიდან, რომელიც მიხეილ ქირიას სტატუსს მოყვა.
შეგახსენებთ, გავრცელებული ინფორმაციით ქართულ თეატრებში მსახიობებს მასიურად გაუნახევრეს ხელფასები. ტვ "პირველის" ინფორმაციით, მსახიობმა ნოდარ მგალობლიშვილმა პროტესტის ნიშნად თეატრი დატოვა. უკმაყოფილება ადრე თუმანიშვილის სახელობის თეატრის მსახიობებმაც გამოთქვეს. გიორგი ყიფშიძე "პრაიმტაიმთან" ამბობდა, რომ ის და მამამისი – ზურა ყიფშიძე სავალალო დღეში არიან.
დღეს, "რეაქციიდან" გახდა ასევე ცნობილი, რომ გარდაცვალებამდე ცოტა ხნით ადრე ხელფასი მსახიობ გივი ბერიკაშვილსაც გაუნახევრეს.