ჯერ არ არის ცნობილი, დატოვებს თუ არა ნაციონალური მოძრაობა საკონსტიტუციო კომისიის შემადგენლობას და დატოვების შემთხვევაში როგორ გეგმავს გააგრძელოს საზოგადოებრივი ინტერესების დაცვა საკონსტიტუტიო პროცესის ფარგლებში.
როგორც „ნაციონალური მოძრაობის“ დეპუტატი სალომე სამადაშვილი ამბობს, გადაწყვეტილებას ამასთან დაკავშირებით პარტია შესაბამისი განხილვების და მსჯელობის შემდეგ მიიღებს. დღეს კი ისინი საკონსტიტუციო კომისიის სხდომას ესწრებიან .
„წარმოდგენილია, ფაქტობრივად, კონსტიტუციის ახალი პროექტი. წარმოდგენილია ასევე რამდენიმე ალტერნატიული წინადადება. ჩვენ მოვისმენთ განხილვებს კომისიის ფაგრლებში, გავეცნობით წარმოდგენილ დოკუმენტებს. სამწუხაროა, რომ აშკარად გამოიკვეთა ხელისუფლების სურვილი, იგნონირება გაუკეთოს საზოგადოებრივ აზრს, ისევე, როგორც ოპოზიციური პოლიტიკური სპექტრის აზრს კონსტიტუციის თაობაზე. ასევე ძალიან სამწუხაროა, რომ დღევანდელი ხელისუფლება ასეთ დაჩქარებულ რეჟიმში ცდილობს მიიღოს ქვეყნისთვის უმნიშვნელოვანესი დოკუმენტი მიუხედავად იმისა, რომ არსებობს მთელი რიგი მოსაზრებები, რომელიც ეწინააღმდეგება წარმოდგენილ პროექტს.
ჩვენ ვიმსჯელებთ ზოგადად საზოგადოებრივ განწყობაზე, ამ დოკუმენტებზე, რომელიც წარმოდგენილია. საბოლოო გადაწყვეტილებას პარტია მიიღებს შესაბამისი განხილვების და მსჯელობის შემდეგ, როგორ გავაგრძელებთ საზოგადოებრივი ინტერესების დაცვას საკონსტიტუტიო პროცესის ფარგლებში,“ – განაცხადა სალომე სამადაშვილმა სხდომის დაწყებამდე ჟურნალისტების მიერ დასმული კითხვის პასუხად.