თბილისში ჩამოსული ევროპის საბჭოს საპარლამენტო ასამბლეის მონიტორინგის კომიტეტის წევრები დღეიდან იწყებენ ოფიციალურ შეხვედრებს ოთხდღიანი ვიზიტის ფარგლებში.
დაგეგმილია აუდიენცია საქართველოს პრეზიდენტთან, პარლამენტის თავმჯდომარესთან, საპარლამენტო ფრაქციებთან. მთავრობის წევრებთან, ასევე მთავარ პროკურორთან და სახალხო დამცველთან.
რამდენიმე შეხვედრა გაიმართება სხვადასხვა თემებზე მომუშავე სამოქალაქო სექტორთან.
მედია თავისუფლება და რუსთავი 2 იქნება ერთ-ერთ მთავარი თემა, რაზეც ყურადღების გამახვილებას ოპოზიცია ევროსაბჭოს დელეგაციასთან შეხვედრაზე აპირებს.
აქცენტი გაკეთდება ასევე ე.წ. მოსმენების კანონზე, პრეზიდენტის უფლებამოსილების შეზღუდვასა და მისი არჩევის წესზე. საპარლამენტო ოპოზიციაში თვლიან, რომ მოსმენების კანონი არსებულ ვითარებას ვერ გააუმჯობესებს.
„დავსვამთ მედიის თავისუფლებასთან დაკავშირებულ და ზოგადად, ადამიანის უფლებების დარღვევებთან დაკავშირებულ საკითხებს და ბუნებრივია, მათ შორის ერთ-ერთი იქნება ე.წ. მოსმენების კანონის შესახებ მსჯელობა, რომელიც გარდა ხელისუფლებისა, არავის მოწონს ამ ქვეყანაში,“ – განაცხადა ფრაქცია ნაციონალური მოძრაობის თავმჯდომარემ რომან გოცირიძემ.