სამაუწყებლო კომპანია „რუსთავი 2“-ის 91%-იანი წილის მფლობელები ლევან და გია ყარამანიშვილები კიდევ ერთ განცხადებას აკეთებენ. მათი თქმით,  ისინი ხვალიდან „რუსთავი 2“-ის კოლექტივთან პირდაპირი კონსულტაციების რეჟიმში გადადიან. განცხადება ამჯერადაც ლევან ყარამანიშვილმა "ფეისბუქის" საკუთარ გვერდზე გაავრცელა. 

 

ყარამანიშვილები უკმაყოფილებას გამოთქვამენ მათ მიერ გუშინ გავრცელებული განცხადების „რუსთავი 2“-ის ეთერში გაშუქების გამო და აცხადებენ, რომ მათი განცხადება, პრაქტიკულად, არ გაშუქებულა.

"სამწუხაროა, რომ ჩვენი გუშინდელი განცხადება, რომელიც 15:25-ზე გავრცელდა, პრაქტიკულად არ გაშუქებულა (მშრალად გავიდა 6 საათიანი კურიერის შუაში, თემის გაუშლელად, და საერთოდ არ გაშუქებულა 9 საათიან კურიერში). ეს იმ ფონზე, როცა გენერალური დირექტორის მიერ მოწვეულ თათბირს ამხელა დრო დაეთმო ეთერში.

ჩვენი განცხადება რომ გაშუქებულიყო, საზოგადოება და ჩვენი კოლექტივი ბევრ უხერხულობას აცდებოდა (პირველ რიგში, ზემოხსენებული თათბირის კონტექსტში). ამიტომ, ხელახლა, უცვლელად ვავრცელებთ ჩვენს გუშინდელ განცხადებას (სადაც ხაზს ვუსვამთ, რომ არანარი შუამავალი შპს-ს მონაწილეობა არ განიხილება) და ხვალიდან გადავდივართ კოლექტივთან პირდაპირი კონსულტაციების რეჟიმში,"-ნათქვამია განცხადებაში.