ჟურნალისტი ლაშა ბერულავა შინაგან კავშირს ხედავს რუსთავი 2 – ში მიმდინარე პროცესებსა და საპარლამენტო უმრავლესობის ლიდერის არჩილ თალაკვაძის მიერ ბოლო დღეებში განვითარებულ მოვლენებამდე გაცილებით ადრე გაკეთებულ იმ განცხადებას შორის, რომელშიც იგი რუსთავი 2-ის ირგვლივ განვითარებული მოვლენების შეფასებისას ამბობს, რომ ,,ბოლო პერიოდში არსებული უცნაური სიხარული და ნიშნის მოგება მომავალ თვეში დასრულდება''.
,,ერთ თვეში რ2-ში ყველაფერი შეიცვლებაო, არჩილ თალაკვაძის ფრაზა ამეკვიატა – წერს ლაშა ბერულავა – ეს:
ა) ან დამთხვევაა (რა უცნაურია ამდენი დამთხვევა);
ბ) ან ყველაფერი ნორმალურადაა და ტყუილად ვშფოთავთ (ნეტა ეგრე იყოს და, ჯანდაბას ნერვები);
გ) ან ხელისუფლების გეგმა B არსებობდა (რა გასაკვირია და);
და თუ გ), მაშინ:
გასარკვევი მხოლოდ ის დარჩა, ვინაა სასარგებლო იდიოტი, ან მთლად უარესი – გეგმის შედგენის მონაწილე.
პასუხი ჯერ ნათელი არ არის.
თუ არის?''
შეგახსენებთ, თალაკვაძის ამ განცხადებას მყისვე მოყვა ოპოზიციის კრიტიკა . ღნიშნავს, რომ ხელისუფლება ვერ მალავს პოლიტიკურ ზიზღს რუსთავი 2-ის კოლექტივის მიმართ.
"ხელისუფლების წარმომადგენლების, მათ შორის ბატონი თალაკვაძის განცხადება პირდაპირ მიანიშნებს ხელისუფლების პირდაპირ ჩართულობას ე.წ ორი კერძო სუბიექტს შორის დავაში, რუსთავი 2 -ის საქმეში. ხელისუფლება ვერ მალავს პოლიტიკურ ზიზღს რუსთავი 2-ის კოლექტივის მიმართ. ძალიან საინტერესოა ყველა ის მხილება, რომელსაც ისინი საკუთარ თავს უწყობენ"- განაცხადა ევროპული საქართველოს ერთ-ერთი ლიდერმა ირაკლი აბესაძემ.
ერთიანი ნაციონალური მოძრაობაში კი დარწმუნებულები არიან, რომ ყოფილი პრემიერი თავისუფალი ტელევიზიის წინააღმდეგ დაწყებულ ბრძოლას წააგებს.
"როდესაც ევროპის სასამართლომ დაიცვა თავისუფალი სიტყვა და დადგა ჩვენი დემოკრატიის სადარაჯოზე ამის დასრულებას თუ გულისხმობს თალაკვაძე, მას უნდა რცხვენოდეს. მე დარწმუნებული ვარ, რომ ბიძინა ივანიშვილი ყველაფერს გააკეთებს თავს დაესხას და ყველაფერი გააკეთოს გეგმის განსახორციებლად, მაგრამ აქვე დარწმუნებული ვარ ის იმთავითვე კრახს განიცდის როგორც ეს აქამდე განიცადა"- განაცხადა თინათინ ბოკუჩავამ.