საქართველოს ქალაქებში ბუნებრივი აირის გაჟონვის შედეგად მოწამლულთა და გარდაცვლილთა რაოდენობა განუწყვეტლივ იზრდება.
სავალალო მდგომარეობაა რუსთავშიც. 1-ელი თებერვლიდან დღემდე რუსთავში გაზის ინტოქსიკაციის 120-ზე მეტი შემთხვევაა დაფიქსირებული. ბოლო სამი დღის განმავლობაში,აქ ბუნებრივი აირის ინტოქსიკაციის შედეგად 5 ადამიანი გარდაიცვალა, მათ შორის ბებია და 12 წლის შვილიშვილი, ასევე ახალგაზრდა ცოლ-ქმარი.
გაზის გაჟონვის შედეგად 3 თვის ბავშვი მოიწამლა თელავში, შემთხვევა რუსთაველის ქუჩაზე მოხდა. ბავშვი თელავის ბავშვთა ჯანმრთელობის ცენტრში სასწრაფო დახმარების ეკიპაჟმა წუხელ გადაიყვანა. როგორც თელავის ბავშვთა ჯანმრთელობის ცენტრში აცხადებენ, 3 თვის ბავშვის ჯანმრთელობის მდგომარეობა დამაკმაყოფილებელია.
„მშობლებმა ცუდად იგრძნეს თავი, გაზის სუნმაც შეაწუხათ, ბებიას თავბრუ დაეხვა, ბავშვს კი ზედმეტი ძილიანობა აღენიშნებოდა. მშობლებს შეეშინდათ და ბავშვი ჯანმრთელობის ცენტრში გადმოიყვანეს. 3 თვის ბავშვს მაშინვე გაეწია პირველადი დახმარება და მიეწოდა ჟანგბადი. ზედმეტი ძილიანობა გაზით ინტოქსიკაციის ერთ–ერთი სიმპტომია. მცირე დოზით იყო მოწამვლა. არსებული ინფორმაციით, ბუნებრივმა აირმა გაზის გამათბობლიდან გაჟონა", – განაცხადა ბავშვთა ჯანმრთელობის ცენტრის დირექტორმა თამილა თეიმურაზიშვილმა.