,,გურია ნიუსის'' ცნობით, დღეს სუსმა ქ. ოზურგეთის საკრებულოს თავმჯდომარე გელა კობალაძე დააკავა. არაოფიციალური ინფორმაციით, კობალაძე ქრთამის აღების ფაქტზეა დაკავებული.
გამოცემა თვითმხილველებზე დაყრდნობით იუწყება, რომ მომხდარიდან რამდენიმე საათის განმავლობაში სახელმწიფო უსაფრთხოების სამსახურის წარმომადგენლები ქალაქ ოზურგეთის მერიის შენობაში იმყოფებოდნენ.
მთლიანად გადაკეტილი იყო მეორე სართული, სადაც ქალაქის მერიაა განთავსებული. კაბინეტებში არ უშვებდნენ თანამშრომლებს.
მერიიდან დოკუმენტაცია გაიტანეს.
უსაფრთხოების სამსახურის თანამშრომლები ჟურნალისტებთან კომენტარს არ აკეთებენ.
თავად ქალაქ ოზურგეთის მერი თავის კაბინეტშია ჩაკეტილი და კონტაქტზე არავისთან არ გამოდის.
"არ ვიცით, რომელი სამსახურიდან გააქვთ დოკუმენტაცია"-ამბობენ პრესსამსახურში.