ჩხოროწყუს მუნიციპალიტეტის „სპორტის ცენტრის“ ყოფილი მწვრთნელი ვარლამ სიჭინავა ადგილობრივ ხელისუფლებას პოლიტიკური ნიშნით სამსახურიდან გათავისუფლებაში ადანაშაულებს. ამის შესახებ დღეს მან მედიისთვის სპეციალურად გამართულ ბრიფინგზე, „ერთიანი ნაციონალური მოძრაობის“ ზუგდიდის ორგანიზაციაში ისაუბრა. მისი განცხადებით, ჩხოროწყუს მუნიციპალიტეტის გამგებლის დავალებით, ცენტრის ხელმძღვანელმა დაკავებული თანამდებობიდან რეორგანიზაციის მიზეზით გაათავისუფლა, თუმცა, სიჭინავას განცხადებით, მან აღნიშნული თანამდებობა პარტიული კუთვნილების და თბილისში, რუსთავი 2-ის მხარდასაჭერ აქციაში მონაწილეობის მიზეზით დაკარგა. ვარლამ სიჭინავა აცხადებს, რომ მას მუნიციპალიტეტის გამგებელმა შესთავაზა დაეტოვებინა ნაციონალური მოძრაობა და ქართულ ოცნებაში გადასულიყო, თუმცა მისი განცხადებით, ამას ვერ გააკეთებდა.
აღნიშნულ ბრალდებებს მედიასთან დღეს ჩხოროწყუს მუნიციპალიტეტის გამგებელმა უპასუხა. დავით გოგუას განცხადებით, უწყებაში ჩატარებული რეორგანიზაციის შედეგად არა მხოლოდ ერთი თანამშრომელი, არამედ 49 ადამიანი გაათავისუფლეს დაკავებული თანამდებობიდან, მათ შორის მმართველი ხელისუფლების აქტიური მხარდამჭერებიც.
სამსახურიდან გათავისუფლებული ვარლამ სიჭინავა აპირებს მიმართოს სასამართლოს ყოფილი დამსაქმებლის წინააღმდეგ.