რუსთავი 2 – ის კორესპოდენტის ცნობით, ქიბარ ხალვაში და პაატა სალია დღეს ევროპის ადამიანის უფლებათა სასამართლოში მივიდნენ.
როგორც ცნობილია პაატა სალიამ, რომელიც გუშინ გვიან ღამით მიუნხენის რეისით გაემგზავრა თბილისიდან, აეროპორტში ,,ჩასაფრებულ'' ჟურნალისტებთან კატეგორიულად უარყო, რომ ევროპაში ქიბარ ხალვაშის სქმესთან დაკავშირებით მიემგზავრებოდა და განაცხადა, რომ პირადი შეხვედრები აქვს დაგეგმილი. როგორც ჩანს, ადვოკატის პირადი შეხვედრა ევროსასამართლოს შენობაში ქიბარ ხალვაშთან შეხვედრას გულისხმობდა.
ადვოკატისგან განსხვავებით, ფაქტზე წასწრებულმა ხალვაშმა განაცხადა, რომ სასამართლოს საკუთარი სიმართლის დასამტკიცებლად წერილით მიმართავს. სავარაუდოდ, ,,სიმართლის'' ძიებაში სტრასბურგში მყოფი საქართველოს საგარეო საქმეთა მინისტრი ჯანელიძეც წაეშველება.