ცოტა ხნის წინ გავრცელდა ინფორმაცია, რომ დაკავებული დეკანოზი გიორგი მამალაძის ჯანმრთელობის მდგომარეობა მოულოდნელად გაუარესდა. ბრალდებულის ადვოკატების განცხადებით, მას დაბალი სიცხე, არტერიული წნევა და ღებინება აღენიშნება.
" . ჩვენ ძალიან გვაინტერესებს, რამ გამოიწვია დაბალი წნევა, ტემპერატურა და ღებინება, მაგრამ ექიმები ვერ ასახელებენ დაკავებულის ჯანმრთელობის მდგომარეობის მოულოდნელად გაუარესების მიზეზებს" – განაცხადა ადვოკატმა, მია ზოიძემ.
მამა გიორგი მამალაძის შეუძლოდ გახდომასთან დაკავშირებით, პროკურორი ჯარჯი წიკლაური ამბობს, რომ დეკანოზი ექიმებმა გასინჯეს და მისი ჯანმრთელობის მდგომარეობა ნორმაშია, ასე რომ, ბრალდებულმა დაკითხვის პროცესი ჩაშალა.
„გვქონდა ბევრი შეკითხვა, რომელზეც ველოდებოდით ამომწურავ პასუხს. ასე ვიყავთ შეთანხმებული ადვოკატებთან და თავად ბრალდებულთან. როგორც კი დავაპირებთ ბრალდებულისთვის კრიტიკული შეკითხვის დასმა, რაც იგეგმებოდა დღეს, მან საერთოდ უარი განაცხადა გამომძიებლებთან შეხვედრაზე და კიდევ ერთხელ მიზეზად დაასახლა ჯანმრთელობის მდგომარეობა. ჩვენ შევადგინეთ შესაბამის ოქმები. ექიმებმა გასინჯეს ბრალდებული ორჯერ, მისი ჯანმრთელობის მდგომარეობა არის აბსოლუტურად ნორმაში და მას თავისუფლად შეეძლო მონაწილეობის მიღება დაკითხვის პროცესში. ეს უკვე მერამდენე შემთხვევაა, როდესაც ბრალდებულმა ჩაშალა დაკითხვის პროცესი,“ – განაცხადა პროკურორმა.
დეკანოზის ადვოკატის მიხეილ რამიშვილის თქმით, მამა გიორგისთან ერთად იყო, როდესაც ცუდად გახდა. მისი თქმით, გიორგი მამალაძე დაკითხვისთვის მზად იყო, მაგრამ მოულოდნელად მას კანკალი დააწყებინა. ექიმმა ურჩია, ცოტა ხანს დაესვენა. ადვოკატმა აღნიშნა, რომ პროკურატურამ დასვენება გადადო შესვენებად.
მიხეილ რამიშვილი პროკურატურას ოქმის მცდარი სახით შეადგენაში ადანაშაულებს. ოქმში აღნიშნულია, რომ მამა გიორგიმ უარი თქვა დაკითხვაზე. ადვოკატის თქმით კი, ეს სიმართლეს არ შეესაბამება, მამა გიორგი დაკითხვისთვის მზად არის და დღეს ის ამას ჯანმრთელობის გაურესებული მდგომარეობის გამო ვერ ახერხებს.
მიხეილ რამიშვილმა სასულიერო პირებს მამა გიორგი მამალაძის მიმართ ყურადღებისკენ მოუწოდა.
„სანამ კიდევ რწმენა მაქვს, კეთილი ინებეთ და თქვენი სულიერი ძმის სიცოცხლეზე იფიქრეთ,“ – განაცხადა მიხეილ რამიშვილმა.
ექიმების მიმართ პრეტენზიები აქვს დაკავებულის კიდევ ერთ ადვოკატს გიორგი ფანცულაიას:
,,ექიმის განცხადებები ურთიერთსაწინააღმდეგოა. მან დაცვის მხარეს ერთი ინფორმაცია მიაწოდა, ხოლო პროკურორებს სხვა, თითქოს მამა გიორგის ჯანმრთელობის მდგომარეობა არ არის ისეთი კრიტიკული, რომ კითხვებზე პასუხის გაცემა ვერ შეძლოს.
„ადამიანს 35.4 აქვს სიცხე, აქვს ციება, აქვს ღებინება, რომელიც დაფიქსირებულია, აქვს დაბალი არტერიული წნევა და ადამიანი არის ცუდად. ამ დროს ექიმი ოთარ ტრაპაიძე ამბობს, რომ მისი ჯანმრთელობის მდგომარეობა არ მოითხოვს აუცილებლობას, გადაიდოს დაკითხვა. უბრალოდ აბსურდი არის თავიდან ბოლომდე,“ – განაცხადა გიორგი ფანცულაიამ.