ვერ დავიჯერებ, მამა გიორგი არ არის ის ადამიანი, ვინმეს მოკვლა შეეძლოს, – ამის შესახებ პატრიარქის დაცვის უკვე ყოფილმა უფროსმა სოსო ოხანაშვილმა ”რუსთავი 2”-ის გადაცემაში ”პოსტსკრიპტუმი” განაცხადა.მისივე თქმით, მიუხედავად იმისა, რომ 2 კვირა გავიდა, მისთვის ყველაფერი ისევ ბურუსით არის მოცული. ”მე ძალიან კარგად ვიცნობ მამა გიორგის და ვიცი რა პრობლემები იყო, რასაც ის ებრძოდა, რაზეც ის მუშაობდა, კერძოდ ქონებებზე”, – განაცხადა ოხანაშვილმა. კითხვაზე, გამორიცხავს იმას, რომ დეკანოზ გიორგი მამალაძეს ჰქონდეს დოკუმენტაცია და ინფორმაცია სასულიერო პირების, მათ შორის მღვდელმთავრების მიერ ჩადენილ დანაშაულებებთან დაკავშირებით, სოსო ოხანაშვილმა განაცხადა, რომ მამა გიორგის ჰქონდა წვდომა უამრავ დოკუმენტაციაზე და ინფორმაციაზე, თუმცა განაცხადა, რომ ამ ეტპაზე ამ პასუხისგან თავს შეიკავებს. ”მაგრამ ეს იმას არ ნიშნავს, რომ მომავალში მე ამაზე არ ვისაუბრებ”, – აღნიშნა ოხანაშვილმა. რაც შეეხება იმას, სჯერა, რომ შესაძლოა მამალაძეს ვინმეს მოკვლა უნდოდა, ოხანაშვილმა განაცხადა, რომ ამის არ სჯერა. ”მაგას ვერ დავიჯერებ. მამა გიორგი არ არის ის ადამიანი, ვინმეს მოკვლა შეეძლოს. ამაზე ფიქრი თავში არც მომდის, უბრალოდ ის არის იმ უსამართლობის მსხვერპლი, რაც მე ჩემს შესახებ ვახსენე. ეს არის ეკლესიის მტრების მიერ კარგად ორგანიზებული, დიდი ხნის წინ დაგეგმილი მზაკვრობა, რაც სისრულეში მოიყვანეს. სამწუხაროდ, ციხე შიგნიდან ტყდებაო და მე დარწმუნებული ვარ, რომ შიგნიდან არიან ჩარეულები”, – აღნიშნა სოსო ოხანაშვილმა.