ხელისუფლება დიდი ხანია გვებრძვის ყველანაირი მეთოდებით და მზად არის ”რუსთავი 2”- ს გადააყოლოს დამოუკიდებელი სასამართლოც, – ამის შესახებ ”რუსთავი 2”-ის გადაცემების ”არჩევანისა” და P.S. – ის წამყვანმა, გიორგი გაბუნიამ რუსთაველის გამზირზე, ტელეკომპანიის მხარდამჭერ აქციაზე სიტყვით გამოსვლისას განაცხადა.
მისივე თქმით, დღეს რუსთაველის გამზირზე წყდება ქვეყნის ბედი.
”ჩვენ შევიკრიბეთ ერთად, რომ ერთხმად ვუთხრათ ხელისუფლებას – დღეს დამოუკიდებელი, თავისუფალი და ევროპული საქართველოს ბედი და ბრძოლა არის ”რუსთავი 2”-ს მოედანზე. ხელისუფლება დიდი ხანია გვებრძვის ყველანაირი მეთოდებით, არაფერზე არ იხევს უკან და მზად არის ”რუსთავი 2”- ს გადააყოლოს დამოუკიდებელი სასამართლოც. ხელისუფლება ვერ ან არ ხვდება, რომ ის ამ ომიდან, ამ ბრძოლიდან ნებისმიერ შემთხვევაში დამარცხებული გამოვა. ის ან დამარცხდება უზენაეს სასამართლოში, ან ხელში ჩაიგდებს ”რუსთავი 2”- ს და დამარცხდება საქართველოსთან, მთელ ქვეყანასთან ერთად, იმიტომ, რომ ეს იქნება ჩვენი დამოუკიდებელი და დემოკრატიული ქვეყნის დასასრული. მაგრამ, ჩვენც არც კი განვიხილავთ ამ ვერსიას, არც კი განვიხილავთ იმ ვერსიას, რომელიც თითქმის ორი დღის განმავლობაში იყო ეკრანზე და რაც ძალიან უნდა ხელისუფლებას, რომ ”რუსთავი 2”- ის ეკრანი იყოს ასეთი შავ-თეთრი.
წელიწადნახევარია უმძიმესი ზეწოლის ქვეშ გვიწევს მუშაობა, მაგრამ ეს ყველაფერი ბევრად უფრო ადრე დაიწყო იმ მომენტიდან, როდესაც ხელისუფლებაში სულ ახალი მოსული იყო ”ქართული ოცნება” და როდესაც დაააკავა ჩვენი გენერალური დირექტორი. იმ წუთიდან მოყოლებული უდიდესი ტვირთი გვადევს მხრებზე, მაგრამ მაინც ვმუშაობთ ისე, რომ ხარისხი არ დაგვიგდია”, – განაცხადა გიორგი გაბუნიამ.