”ნაციონალური მოძრაობის” ერთ-ერთი ლიდერი, ნიკა მელია პრემიერ-მინისტრსა და პროკურატურას მოუწოდებს, მოსახლეობას ბოდიში მოუხადონ .
ნიკა მელია პროკურატურის განმარტებას გამოეხმაურა, რომლის მიხედვით, დეკანოზ გიორგი მამალაძის ბრალში პატრიარქის მოწამვლაზე საუბარი არ ყოფილა.
”პრემიერ-მინისტრმა განაცხადა, რომ აღკვეთილია ქვეყნის წინააღმდეგ მიმართული დანაშაული. ”ქართული ოცნების” სხვა ლიდერებმა, მთავარმა პროკურორმა განაცხადეს, რომ უმაღლესი იერარქიის სასულიერო პირის მიმართ არის აღკვეთილი მძიმე დანაშაული. ამის შემდეგ პრემიერ-მინისტრი აგზავნის სკუთარ, პირად მცველებს ბერლინში პატრიარქის დაცვის გასაძლიერებლად. აქედან გამომდინარე, ბუნებრივია, ყველამ ვიფიქრეთ და დავრწმუნდით, რომ ეს საქმე ეხებოდა პატრიარქს.
დღეს, იგივე ხალხი, პრემიერ-მინისტრი, პროკურატურა და ”ქართული ოცნება” საუბრობს, რომ სასულიერო პირს თურმე არ ეხებოდა. ამიტომ, მიმაჩნია, რომ როგორც მინიმუმ, პროკურატურამ, პრემიერ-მინისტრმა ბოდიში უნდა მოუხადონ საზოგადოებას. ამავე დროს, დეტალებში უნდა გააცნონ საქმის მასალები ამ ქვეყნის მოსახლეობას, ვინც დარწმუნებული იყო, რომ თურმე პატრიარქზე თავდასხმა მზადდებოდა. რეალურად აღმოჩნდა, რომ პატრიარქი არაფერ შუაში ყოფილა”, – განაცხადა ნიკა მელიამ.