მთავრობის კანცელარიაში მეათე დღეა შიმშილობს აფხაზი სეპარატისტების ტყვეობაში მყოფი ქართველი მებრძოლის გიორგილუკავას მეუღლე, რვა შვილის დედა ( აქედან სამი ბავშვი გარდაცვლილი ჰყავს) ლალი ბასარია.
იგი აცხადებს, რომ პროტესტის ამ უკიდურეს ფორმას მიმართა ხელისუფლების მხრიდან ლუკავას საქმის მიმართ არასათანადო ყურადღების მიზეზით, თუმცა ხელისუფლებამ ნაცვლად ამ ვითარების გამოსწორებისა, კიდევ უფრო მეტი უყურადღებობა გამოიჩინა ახლა უკვე მოშიმშილის მიმართ.
მოშიმშილე ქალბატონი გარკვეული პერიოდი დენისა და გათბობის გარეშეც დატოვეს. „ვერ ვსუნთქავ უკვე მეწებება ფილტვები, რადგან წყალი არ მიმიღია. არ რცხვენია ხელისუფლებას? ნუთუ არ დააინტერესა ხუთი მცირეწლოვანი ბავშვის იღბალი? მოსულიყვნენ და თანადგომა მაინც გამოეცხადებინათ,“-აცხადებს ლალი ბასარია.
მოშიმშილე აფხაზეთში დატყვევებულ მეუღლესთან გიორგი ლუკავასთან საუბრის უფლებას ითხოვს, წინააღმდეგ შემთხვევაში შიმშილობის შეწყვეტაზე უარს აცხადებს.