ზუგდიდის მუნიციპალიტეტის სოფელ რუხში, ე.წ საჭკადუოს ყოფილ საბავშვო ბაღში, სადაც აფხაზეთიდან იძულებით გადაადგილებული რამდენიმე ოჯახი ცხოვრობს დღეს დილით ხანძარი გაჩნდა. ხანძრის შედეგად დამწვარია საცხოვრებელი ოთახი და სახურავი. დაზარალებულის განცხადებით, მისთვის უცნობია ხანძრის გამომწვევი მიზეზები, რადგან შემთხვევის დროს ადგილზე არ იმყოფებოდა, თუმცა მისივე თქმით, ხანძარი სავარაუდოდ შეშის ღუმელმა გამოიწვია.
შემთხვევის ადგილზე იმყოფებოდა აფხაზეთის ავტონომიური რესპუბლიკის სამეგრელო-ზემო სვანეთის წარმომადგენლობის ხელმძღვანელი. ალექსანდრე ჩიკვაიძის განცხადებით, ისინი დაზარალებულ ოჯახს დახმარებას გაუწევენ – დროებით დაუქირავებენ საცხოვრებელ ფართს ან შეუცვლიან დაზიანებულ და უვარგის სახურავს. თუმცა დაზარალებული წინააღმდეგია დაქირავებულ ფართში გადასვლაზე, რადგან, მისი სიტყვებით, მან „არ იცის თუ რამდენი ხანი მოუწევს ქირით ცხოვრება“.
შემთხვევის შედეგად არავინ დაზიანებულა. ცეცხლის ლოკალიზება კი ყოფილი ბაღის შენობაში მცხოვრები დევნილების მიერ გახდა შესაძლებელი.